Японияда мактаб ўқувчисини ўлдиргани учун 39 йил қамоқда ўтирган эркакка нисбатан чиқарилган ҳукм бекор қилинди. Бу ҳақда NHK телеканали хабар бермоқда.
Маълум қилинишича, ҳозирда 60 ёшли Сёши Маэкава дастлаб 1986 йилда Япон денгизи қирғоғидаги Фукуи шаҳрида талабани ўлдирганлиги учун қамоқ жазосига ҳукм қилинган эди. У ўзига берилган жазо муддатини ўтаб бўлган.
Маэкава изчил равишда ўз айбсизлигини таъкидлаб келган ва ўтган йил октябрь ойида ишни қайта кўриб чиқиш ҳақидаги иккинчи мурожаатига жавобан унга ишни қайта кўриб чиқиш ҳуқуқи берилган.
Телеканал хабарида айтилишича, эркакнинг иши бўйича қайта суд жараёнида Нагоя олий судининг Каназава бўлими уни оқлаган.
Ишни қайта кўриб чиқиш жараёнида қотиллик кечаси Маэкавани қонли кийимда кўрганини айтган гувоҳларнинг кўрсатмалари шубҳа остига олинган. Бундан ташқари, тергов илгари эътибор бермаган гувоҳлар кўрсатмаларидаги янги фактик номувофиқликлар аниқланган.
Таъкидланишича, якуний ҳукмни эълон қилган судья Маэкавадан 39 йил давомида етказилган азоб-уқубатлар учун узр сўраган. Маэкаванинг ўзи эса матбуот анжуманида ўз айбсизлигини исботлай олганидан хурсанд эканини билдирган.
Қайд этилишича, Маэкава суд биносига ярим аср ўлим камерасида ўтирган, 2025 йилда оқланиб қамоқхонадан чиққан бошқа япониялик собиқ маҳбус Ивао Хакаматанинг синглиси совға қилган шляпада кирган.
Март ойида Япониянинг Сидзука префектураси округ суди 47 йилдан ортиқ ноҳақ қамоқда ўтирган ва кейинчалик оқланган 89 ёшли Ивао Ҳакаматага тахминан 217 миллион иена (тахминан 1,44 миллион доллар) товон пули тўлашга қарор қилганди.
Изоҳ (0)