“Қозоқмис” корпорациясига тегишли “Жомарт” конидаги шахта ўпирилиши оқибатида 7 нафар кончи ҳалок бўлди. Бу ҳақда Қозоғистон Фавқулодда вазиятлар вазирлиги хабар берди.
Қидирув ишлари давомида 7 нафар кончи ўлик ҳолда топилган. Уларнинг жасади 18 февраль куни эрталаб соат 4 га яқин аниқланган. Суд-тиббий экспертизаси ўтказиш учун жасадлар полиция ходимларига топширилган. Бош вазири Ўлжас Бектеновнинг топшириғига кўра, шахта ўпирилиши сабабларини текшириш ва жабрланганларга ёрдам кўрсатиш бўйича махсус комиссия тузилган. Унга бош вазир ўринбосари Қанат Бозумбаев раҳбарлик қилмоқда.
Дастлабки маълумотларга кўра, “Қозоқмис” корпорацияси конларига хос бўлмаган табиий газ портлаши содир бўлган. Ҳодисанинг тафсилотлари ва сабаблари аниқланмоқда. “Жомарт” конидаги шахта қулаши ортидан жиноят иши қўзғатилди.
Мазкур ҳолат юзасидан Жиноят кодексининг 277-моддаси 3-қисми “Тоғ-кон ёки қурилиш ишларини олиб боришда хавфсизлик қоидаларини бузиш” билан иш қўзғатилди, дейилади хабарда.
Ҳозирда барча зарур тергов ҳаракатлари олиб борилмоқда.
Қозоғистон президенти ҳамдардлик билдирди
Қосим-Жўмарт Тўқаев Улитау вилоятида шахтёрлар ҳалок бўлгани муносабати билан қурбонларнинг оиласига ҳамдардлик билдирди. Президент ҳукуматга фавқулодда ҳодиса сабабларини синчковлик билан ўрганиш бўйича топшириқ берди.
“Қозоқмис” ҳалок бўлган кончиларнинг оилаларига моддий ёрдам кўрсатади. Бунда ходимнинг ўртача йиллик иш ҳақининг 10 баравари миқдорида компенсация, шунингдек, дафн маросимини ташкил этиш учун 2 миллион тенгедан ортиқ маблағ ажратилади.
Бундан ташқари, боқувчисини йўқотганлик учун ҳар ойлик тўловлар, болаларнинг ўқиши учун тўловлар, ҳалок бўлган ходимларнинг кредитлари ва қарзларини тўлаш ҳамда қариндошларининг мурожаатлари бўйича бошқа турдаги ёрдамлар кўзда тутилган.
Изоҳ (0)