Фарғона вилоятининг Қўқон шаҳридаги автомобилларга газ тўлдириш компресслаш шохобчасида 2,9 млрд сўмлик газдан ноқонуний фойдаланилди. Бу ҳақда Бош прокуратура матбуот хизмати хабар берди.
Маълум қилинишича, “А.М.А” МЧЖ мансабдор шахслари жамиятга қарашли метан заправканинг ўлчов қурилмаларига ташқи таъсир кўрсатиши оқибатида табиий газни талон-торож қилган.
Ҳолат юзасидан жамият мансабдор шахсларига нисбатан Жиноят кодексининг 169-моддаси 4-қисми “а” банди (ўғрилик жуда кўп миқдорда) билан жиноят иши қўзғатилган.
“Свет” ва газдан ноқонуний фойдаланаётган метан заправкалар
Апрель ойида Тошкент вилояти Бўка туманидаги метан заправкада бир ойда 1,8 миллиард сўмлик табиий газдан ноқонуний фойдаланилгани аниқланган эди. Май ойида Қорақалпоғистонда 222,6 млн сўмлик газни мувофиқлик сертификатисиз сотган заправка жаримага тортилганди.
Май ойида Фарғона вилоятидаги метан заправкада 1 миллиард сўмдан зиёд табиий газдан ноқонуний фойдаланилгани аниқланди. Август ойида эса Ўзбекистон туманидаги метан газ тўлдириш шохобчасида 792,5 миллион сўмлик табиий газдан ноқонуний фойдаланиш ҳолати фош этилганди.
Бундан ташқари, Ангрендаги метан заправкада 1,1 млрд сўмлик электр энергиясидан, Самарқанддаги метан заправкада 6,6 млрд сўмлик газдан ноқонуний фойдаланилгани аниқланган.
Изоҳ (0)