АҚШ президенти Дональд Трамп “яқин келажакда” The Wall Street Journal (WSJ), унга тегишли бўлган News Cорп. медиа ҳолдинги ва ҳолдинг эгаси Руперт Мердокни туҳмат учун судга беришга ваъда берди. Бу ҳақда Оқ уй раҳбари ўзининг Truth Social саҳифасида маълум қилди.
17 июль куни WSJ Трамп 2003 йилда молиячи Жеффри Эпштейннинг 50 ёшга тўлиши муносабати билан унга совға қилган табрикнома тавсифи келтирилган материални эълон қилди. Газетанинг ёзишича, Эпштейннинг дугонаси Гилен Максвелл унга дўстларидан келган мактублар солинган альбомни совға сифатида тайёрлаб қўйган. Нашрнинг фикрича, хатлардан бирига “Дональд” имзоси қўйилган табрикнома муаллифи Трамп ҳисобланади.
Газета табрикномани “уятсиз” деб таърифлайди. Машинкада ёзилган матннинг бир неча сатри қўлда ёғли маркер билан чизилганга ўхшаш яланғоч аёл контури билан ўралган.
Бир жуфт кичик ёйлар аёлнинг кўкрагини, бўлажак президентнинг имзоси эса қов сочига ўхшатиб, белидан пастроқда “Дональд” деб ёзилган тўлқинсимон ёзувни англатади, дейилади мақолада.
АҚШ Президенти газетага берган изоҳида ўзи бу хатни ёзганини ёки расм чизганини рад этган.
“Мен умримда ҳеч қачон расм чизмаганман. Мен аёлларни чизмайман. Бу менинг услубим эмас. Бу менинг сўзларим эмас”, деди у ва материал эълон қилинган тақдирда нашрни судга бериш билан таҳдид қилган.
Трамп Truth Social тармоғидаги саҳифасида WSJни судга бериш нияти ҳақида огоҳлантирганини эслатган.
“Жаноб Мердок бу масалани ҳал қилишини айтди, лекин, афтидан, бунинг имкони бўлмаган. Улар барибир ёлғон, ғаразли ва туҳмат тўла ҳикояни тарқатишмоқда. Президент Трамп тез орада The Wall Street Journal, News Cорп. ва жаноб Мердокни судга беради”, деб ёзди Трамп.
Жеффри Эпштейн 2019 йилнинг ёзида АҚШда қизлар, жумладан, 14 ёшли қизлар савдоси ва уларни фоҳишаликка ундашда айбланиб, қўлга олинган. Ўша йилнинг август ойида 66 ёшли миллиардер судни кутмасдан қамоқхонада ўз жонига қасд қилди. Унинг Буюк Британия фуқароси бўлган дугонаси ва шериги Гилен Максвелл жинсий эксплуатация мақсадида одам савдосига ёрдам бергани учун 20 йиллик қамоқ жазосини ўтамоқда.
Изоҳ (0)