Статистика агентлиги 2025 йил январь ойидаги саноат ишлаб чиқариш ҳажми бўйича маълумотларни очиқлади.
Қайд этилишича, ҳозирда Ўзбекистонда 56,3 мингта саноат корхоналари фаолият юритмоқда. 2024 йил 1 февралида бу рақам 68,7 мингта бўлган. Мазкур турдаги корхоналар сони бир йил ичида қарийб 12 400 тага қисқарган. Шунга қарамай, ой давомида 55,8 трлн сўмлик саноат маҳсулотлари ишлаб чиқарилган (2024 йил мос даврида 44,6 трлн сўм).
Январь ойида бир неча муҳим саноат маҳсулотларини ишлаб чиқариш ҳажми сезиларли қисқарган. Буни, масалан, доимий камайиш трендига ўтган табиий газни қазиб олиш бўйича рақамлардан кўриш мумкин. Ўтган ойда 3 млрд 875 млн метр куб газ қазиб олинган. Таққослаш учун, 2024 йил январдаги натижалар 3 млрд 994 млн метр куб эди.
Ўтган йил январдагидан фарқли ўлароқ, бу йилги қишнинг илк ойида электр энергияси ишлаб чиқариш ҳажми қисқарди. Ой давомида мамлакатда 7 млрд 253 млн кВт/соат электр энергияси ишлаб чиқарилган (2024 йил январда 7 млрд 576 млн кВт/ соат бўлган).
2025 йил январда автомобиль бензини ҳам кам ишлаб чиқарилган — 99 тонна. Ўтган йилнинг мос даврида мазкур рақам 124,6 тонна эди. Январда айниқса, дизель ишлаб чиқариш ҳажми кескин қисқарган. Қишнинг биринчи ойида 33,2 тонна дизель ишлаб чиқарилган бўлса, 2024 йил январида бу кўрсаткич 50,2 тонна эди.
Январда енгил автомобиллар ишлаб чиқариш сони ҳам камайган. Хусусан, республикада 14 минг 968 дона автомобиль ишлаб чиқарилган. 2024 йил мос давридадаги рақамлар эса 15 минг 654 донани ташкил этган. Бу йил январь ойи давомида энг кўп ишлаб чиқарилган автомобиль Cobalt — 5 660 дона ( ўтган йил мос давридагидан 68 фоиз кўп) бўлган.
Изоҳ (0)