Андижон, Самарқанд ва Сирдарё вилоятларида энергия ресурсларидан ноқонуний фойдаланганлик ҳолатлари фош этилди, деб хабар бермоқда Прокуратура департаменти.
Унга кўра, Бош прокуратура ҳузуридаги департаментнинг Андижон тумани бўлими томонидан ўтказилган тадбирда “М-С.Б.” МЧЖ масъул шахслари МЧЖ биносида умумий фойдаланишдаги электр тармоғига ўзбошимчалик билан уланиб, 300,5 млн сўмлик электр энергиясидан ноқонуний фойдалангани аниқланган.
Шу каби, департаментнинг Самарқанднинг Нарпай тумани бўлими томонидан ўтказилган терговга қадар текширувда фуқаро Қ.Ф. “Гулистон” МФЙ ҳудудидаги нотураржой биносида тижорат мақсадида ўзбошимчалик билан электр тармоғига уланиб, 125 млн сўмлик электр энергиясидан ноқонуний фойдалангани аниқланган.
Департаментнинг Сирдарё тумани бўлими томонидан ўтказилган терговга қадар текширувда фуқаро Р.М. “Камолот” МФЙ ҳудудидаги хонадонида иситиш печларини тижорат мақсадида ўзбошимчалик билан газ тармоғига улаб, 119 млн сўмлик энергия ресурсларидан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Бундай ҳолатлар сони ортиб бормоқда
Аввалроқ Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди
- Қорақалпоғистоннинг учта ҳудудида 845 млн сўмлик газдан ноқонуний фойдаланилди
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди
- Учта вилоятда қарийб ярим млрд сўмлик газдан ноқонуний фойдаланилди
Изоҳ (0)