Қашқадарё вилояти Муборак туманида экскаватор сабаб 4753 та аҳоли ва 65 та улгуржи истеъмолчи газсиз қолди. Бу ҳақда “Ҳудудгаз Қашқадарё” газ таъминоти филиали матбуот хизмати хабар берди.
Келтирилишича, ер қазишга мўлжалланган автотранспорт воситаси ҳайдовчисининг эҳтиётсизлиги натижасида юқори босимли газ қувурига шикаст етган. Авария ҳолатини зудликда бартараф қилиш мақсадида бугун, 20 февраль куни соат 13:50 дан 17:00 га қадар туманнинг “Кончилар”, “Ёшлик”, “Дўстлик”, “Тонг”, “Бобур” ва “Алишер Навоий” маҳалласидаги 4753 хонадон ва юқоридаги ҳудудларда жойлашган 65 та улгуржи истеъмолчида табиий газ таъминоти вақтинча тўхтатилди.
Таъмирлаш ишлари якунлангандан сўнг, таъминот қайта тикланиши таъкидланган.
Вилоятда бу каби ҳолат аввал ҳам кузатилганди. Хусусан, бир ҳафта аввал, 12 февраль куни вилоятдаги Карактай газ қувури тармоғининг муҳофаза майдонида номаълум экскаватор томонидан олиб борилган ер қазиш ишларини бажариш вақтида газ қувурига шикаст етказилган. Шу муносабат билан Қашқадарё вилоятининг қуйидаги ҳудудларидаги 28 229 та аҳоли ва 716 та улгуржи истеъмолчиларда газ таъминот вақтинча тўхтатилган.
Бундан ташқари, пойтахтда ҳам шу ҳолат содир бўлган. Тошкент шаҳри Яккасарой тумани, Бобур кўчасида 8 ноябрь куни экскаватор ёрдамида қазиш ишлари олиб борилаётганда, эҳтиётсизлик оқибатида ўрта босимли газ қувурига шикаст етказилган. Натижада Яккасарой ва Миробод туманларида табиий газ тармоғидан вақтинча ўчирилган.
Изоҳ (0)