Россия президенти Владимир Путин ва АҚШ президенти Дональд Трамп ўртасидаги учрашувни ўтказиш учун “Ташқи ишлар вазирлиги йўналиши бўйича маълум тайёргарлик” керак. Бу ҳақда Россия етакчисининг матбуот котиби Дмитрий Песков журналистларга маълум қилди.
Унинг сўзларига кўра, учрашув февраль ойининг охиригача бўлиб ўтиши мумкин, аммо бу муддат ичида томонлар келиша олмаслиги эҳтимоли ҳам мавжуд.
АҚШ президенти февраль ойи охиригача россиялик ҳамкасби билан учрашиш имкониятини истисно этмади.
Аввалроқ Россия президенти ёрдамчиси Юрий Ушаков 18 февраль куни Ар-Риёдда бўлиб ўтган Россия–АҚШ музокараларида икки давлат раҳбарларининг эҳтимолий учрашуви муҳокама қилинганини маълум қилганди.
Биз бунга тайёрмиз, бироқ икки етакчи учрашувининг аниқ санаси ҳақида гапириш ҳали қийин, деди Ушаков.
АҚШ ва Россия президентлари Дональд Трамп ва Владимир Путин келаси ҳафтадаёқ учрашув ўтказиши мумкинлиги ҳақида Bloomberg аниқ манбаларга ҳавола қилмасдан хабар берди.
Саудия Арабистонидаги ушбу музокаралар икки етакчининг кейинги ҳафтадаёқ учрашувига йўл очиши мумкин, дейилади хабарда.
Трамп ва Путин февраль ойи ўрталарида телефон орқали мулоқот чоғида юзма-юз учрашув ўтказиш бўйича келишувга эришган эди. Америка президентининг маълум қилишича, улар ўзаро ташрифлар режаларини муҳокама қилган. Ўз навбатида Россия президенти Трампни Москвага таклиф қилган эди.
Аввалроқ NBC нашри АҚШ Украина делегациясини Саудия Арабистонидаги Россия билан музокараларга таклиф этмагани, чунки Вашингтон Москва ва Киев вакиллари билан алоҳида икки томонлама учрашувлар ўтказиб, кейинчалик қўшма учрашув уюштирмоқчи экани ҳақида ёзган эди.
Бу бизнинг Россия билан ҳам, Украина билан ҳам бир хил фаолликда ҳамкорлик қилаётганимизни кўрсатади. Биз ўлимларни тўхтатиб, мустаҳкам тинчликка эришишни хоҳлаймиз, деди телеканал суҳбатдошларидан бири.
Изоҳ (0)