Hyundai кемасозлик компанияси ўзбекистонликларни ишга олади, деб хабар бермоқда Ташқи меҳнат миграцияси агентлиги.
Унга кўра, Hyundai кемасозлик компанияси билан ҳамкорликда Корея технологияси асосида малакали кадрлар тайёрлаш учун 3 ойлик ўқув курсларига энди ЭПС-Топик имтиҳонларидан ишлаб чиқариш соҳасида муваффақиятли ўтиб, СPAS электрон базасида тасдиқланган фуқаролар таклиф этилади.
Ойлик маоши 2500 АҚШ долларигача кафолатланган бўлади. ЭПС-Топик (ишлаб чиқариш соҳасида) имтиҳонларида 80 балдан юқори натижа кўрсатган ёки ўтиш баллари 80 дан кам бўлган тақдирда Топик, “Қирол Сежонг” сертификатларига эга номзодлар 21 февраль кунигача ҳужжатларини Миграция агентлигининг ҳудудий филиалларига тақдим қилиб, саралаш босқичида иштирок этиши мумкин.
“2023 йилда ишлаб чиқариш соҳасида ЭПС-Топик имтиҳонларидан ўтган номзодлар учун алоҳида эслатма: Агар сиз СPAS электрон базасида 2 йил муддатга 2024 йилнинг ноябрь ойида тасдиқланган бўлсангиз, ўқув курси учун саралаш босқичларида иштирок этишингиз мумкин”, дейилмоқда агентлик хабарида.
Мурожаат учун: 71 202 33 55 (ички рақам 41/42)
Бундан аввал Литва корхоналари билан 200 нафар Ўзбекистон фуқаросини ишга жойлаштириш тўғрисида келишувга эришилганди. Шунингдек, ўзбекистонликлар Японияга логистика, аэропорт хизмати ва юк ташиш йўналишларида ишга юборилиши айтилганди.
Ўзбекистонда 2018—2023 йилларда аҳоли даромадининг 16 фоизи мигрантлар улушига тўғри келган. Чет элларда ишлаётган юртдошлар ҳар йили Ўзбекистонга ўн икки-ўн беш миллиард доллар жўнатади.
Президентнинг “Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида”ги қарори қабул қилинган.
Қарорга кўра, 2024 йил 1 ноябрдан:
- хорижий иш берувчилар томонидан таклиф қилинаётган иш ўринлари ҳақидаги барча маълумотлар Миграция агентлигининг электрон платформаси, ОАВ ва ижтимоий тармоқларда очиқ эълон қилиб борилади;
- Агентликнинг электрон платформасида фуқароларга ўзининг резюмесини шакллантириш ва жойлаштириш ҳамда эълон қилинган иш ўринлари бўйича танловларда эркин иштирок этиш имконияти яратилади;
- вақтинча меҳнат фаолиятига чиқиб кетаётган фуқароларга Миграция жамғармаси ҳисобидан 10 миллион сўмгача икки йил муддатга микрокредитлар ажратилади;
- фуқароларнинг хорижда ишга жойлашиши ва “ишчи виза”га оид ҳужжатларини расмийлаштириш бўйича бепул консалтинг хизматлари кўрсатилади.
2024 йил 1 декабрдан агентлик томонидан таълим ташкилотларида хорижга ишга кетмоқчи бўлган фуқароларни касб-ҳунар ва чет тилларига ўқитиш бўйича буюртмалар жойлаштириш тартиби жорий этилади.
Шунингдек, хусусий бандлик агентликлари томонидан лицензия олиш учун захира қилинадиган маблағлар миқдори БҲМнинг 8500 бараваридан 4000 бараваригача туширилади.
Изоҳ (1)
Ногронлиги борларга хам лиготаларни купайтирилса яхши буларди