Украина президенти Владимир Зеленский ўзининг паст рейтингига қарамай, сайловлар ўтказишдан бош тортмоқда, деб ёзди АҚШ президенти Дональд Трамп Truth Social ижтимоий тармоғида.
Трамп, шунингдек, украиналик ҳамкасбини “диктатор” деб атади.
Сайловсиз диктатор. Зеленский тезроқ ҳаракат қилиши керак, акс ҳолда унинг мамлакати буткул тамом бўлади. Биз Россия билан урушни тугатиш бўйича музокараларни муваффақиятли олиб бормоқдамиз. Буни фақат Трамп ва унинг маъмурияти уддалай олишини барча эътироф этди, дейди АҚШ етакчиси.
У “Украинани яхши кўриши, бироқ Зеленский жуда ёмон иш қилгани сабабли унинг мамлакати вайрон бўлгани ва миллионлаб одамлар сабабсиз ҳалок бўлгани”ни қўшимча қилди.
Трампнинг таъкидлашича, Зеленский АҚШни “ҳеч қачон бошланмаслиги керак бўлган, ғалаба қозониб бўлмайдиган уруш учун” 350 миллиард доллар ажратишга кўндира олган.
Америка раҳбарининг аниқлик киритишича, ушбу сумма Европа Украина учун сарфлаган миқдордан 200 миллиард долларга кўп ҳамда Зеленский АҚШдан олинган маблағнинг ярми йўқолганини тан олган.
Аввалроқ Украина президенти Вашингтон Киевга гўёки 500 миллиард долларлик ёрдам бергани ҳақидаги маълумотлар ҳақиқатга тўғри келмаслигини айтган эди.
Бизда бутунлай бошқа рақамлар мавжуд. Бизда ҳамма нарса жуда аниқ. Уруш бизга 320 миллиард долларга тушди. 120 миллиард — бу биз, Украина халқи, солиқ тўловчилар. 200 миллиард — бу АҚШ ва Европа иттифоқдошлари. Бу қурол-яроғ тўпламлари. АҚШ бизга тахминан 67 миллиард долларлик қурол-яроғ ва 31,5 миллиард долларни бюджетга тўғридан тўғри молиявий ёрдам сифатида берган, дея аниқлик киритди Украина етакчиси.
Шу билан бирга, Зеленский гўёки 500 миллиард долларлик ёрдам ва уни минераллар ёки бошқа ресурслар билан қайтариш ҳақидаги баёнотлар ҳақиқатга тўғри келмаслигини қўшимча қилди.
Алоҳида дастурлар ҳам бўлган, албатта, биз инсонпарварлик ёрдами учун миннатдормиз, аммо ёрдамнинг умумий қиймати 500 миллиард долларни ташкил этди, деб айтиб, уни минераллар ёки бошқа нарсалар билан қайтаришни талаб қилиш мумкин эмас. Бу жиддий гап эмас. Бироқ биз жиддий ҳужжатга тайёрмиз. Бизга хавфсизлик кафолатлари керак, дейди сиёсатчи.
Изоҳ (0)