2025 йилда Дональд ва Мелания Трамп никоҳларининг 20 йиллигини нишонлашди. Аммо кўпчилик ҳали ҳам жуфтликнинг бахтли эканига шубҳа қилади. Аслида уларнинг муносабатлари қандай?
2005 йил 22 январда модел Мелания Кнавс муваффақиятли тадбиркор Дональд Трампга турмушга чиқди. Шу тарзда дунёдаги энг кўп муҳокама қилинадиган жуфтликлардан бири пайдо бўлди. Ўша пайтда ҳеч ким Дональд икки марта АҚШ президенти бўлишини, словениялик Мелания эса биринчи хоним бўлишини тасаввур ҳам қилолмасди.
Трампнинг биринчи президентлик муддати пайтидаёқ матбуотда тез-тез никоҳ бузилиш арафасида экани, Мелания эрини ёқтирмаслиги ва буни ҳатто яширмаслигига оид мақолалар пайдо бўларди: гоҳ жамоат олдида унинг қўлини олмайди, гоҳ ўпиш учун истамайроқ юзини тутади.
Аммо жуфтлик билан ишлайдиган манбаларга кўра, булар шунчаки тахминлардан бошқа нарса эмас.
“Унда қандайдир ўзига хослик бор — у кучли аёл, аммо шу билан бирга юмшоқ характерга ҳам эга. У эрини чиндан ҳам мувозанатда ушлаб туради”, дейди биринчи хонимнинг расмий фотосуратчиси Режин Мао Hellо! журнали билан суҳбатда.
“Улар кўп нарсаларни бошдан кечирган. Мелания садоқатли, у эрини севади, Дональд ҳам уни севади”, дея давом этади Мао.
Оилавий тотувликнинг сирларидан бири Меланиянинг иккинчи ўринга туша олиш қобилиятидир.
“У доимо керакли жойда ва эрининг ортида туради. Биринчи ўринда доимо эри туради. Унинг оилавий қадриятлари мустаҳкам, у яхши рафиқа ва фарзандлари бахтли бўлиши учун ҳамма нарса қилишга қодир аёл”, деб фикр билдиради Режин.
Шу билан бирга, Мелания ҳақиқатан ҳам мувозанат сақлашнинг ва эрининг соясида қолиб кетмасликнинг уддасидан чиқаётганини исботламоқда. Трамп хоним суҳбатларида улар бир бутун эмас, балки икки алоҳида шахс эканлигини таъкидлаган.
“Эҳтимол, баъзи одамлар мени шунчаки президентнинг рафиқаси сифатида кўришар. Аммо мен ўз оёғимда турибман, мустақилман. Менинг ўз фикрларим бор. Мен ҳар доим ҳам эримнинг айтганлари ёки қилганларига қўшила олмайман ва бу нормал ҳолат. Мен унга маслаҳатлар бераман, у баъзан қулоқ солади, баъзан эса йўқ”.
Меланиянинг ходимлари таъкидлашича, биринчи хоним доимо уларга ҳурмат билан муносабатда бўлади, шунингдек, у барча ишларни ёрдамчиларга юклаб қўядиганлардан эмас.
“У сизга қаҳвани ҳам ўзи дамлаб бериши мумкин. Агар бу аёлни хизматкорлар қуршовида тасаввур қилсангиз, янглишасиз”, дея қўшимча қилади стилист ва дизайнер.
Ички доиралар Меланияни “қизиқувчан ва мулоҳазали шахс” сифатида таърифлашади.
Умуман олганда, Меланиянинг феъл-атвори ва ички “мен”и борлиги аниқ. Шу билан бирга, ўз кучига қарамай, Мелания ҳозирги ролини барча ижобий ва салбий томонлари билан хотиржам қабул қилади.
“Биласизми, менинг асосий устувор вазифам она бўлиш, биринчи хоним бўлиш, рафиқа бўлиш, Оқ уйга қайтганимиздан сўнг эса ватанга хизмат қилиш”, деганди у эрининг иккинчи инаугурацияси олдидан.
Изоҳ (0)