“Муҳташам юз йил”, “Қалбим эшигини қоқ” ёки “Қўрғон сирлари” Туркияда энг шов-шувли ва юқори рейтингга эга сериал, деб ўйласангиз, адашасиз. Дизи оламида бундан ҳам юқори эътироф этилган қизиқарли лойиҳа мавжуд. Сўз “Ижарага олинган севги” сериали ҳақида бормоқда.
Сериал нима ҳақида?
“Ижарага олинган севги” томошабинни интригалар, кутилмаган бурилишлар ва ҳаяжонли муҳаббат оламига олиб борадиган сериал. Омер — мода бизнесида муваффақиятга эришган ёш ва келишган йигит. Унинг оиласи Омернинг АҚШдан қайтган қизга уйланишини орзу қилади.
Қиз ниҳоятда гўзал, ўқимишли, лекин фақат юқори жамиятда порлашни истайди ва ўз мақсадига эришиш учун ҳамма нарсани қилишга тайёр. Омерни эса булар мутлақо қизиқтирмайди. Қизнинг дунёқараши турк халқиникидан ажралиб туриши йигитга ёқмайди.
Ўзига юкланган босимдан халос бўлиш учун Омер ҳамманинг кўз ўнгида камтар, меҳрибон ва чиройли официант қиз — Дафнани ўпади. Бу хатти-ҳаракати унинг оиласи ва, айниқса, холасининг ғазабига сабаб бўлади, у Омернинг ҳаётини нолойиқ қиз билан боғлашига йўл қўймаслик учун қўлидан келган ҳамма ишни қилади.
Томошабинлар нима дейди?
Томошабинлар орасида ушбу сериал юқори кўрсаткичга эга, буни рейтинглар ҳам тасдиқлайди. Масалан, “Кинопоиск.ру”да ушбу фильмнинг рейтинги 8,3 балл, “Муҳташам юз йил”нинг рейтинги эса 8,2 баллга эга.
“Бу шунчаки муҳаббат ҳақидаги одатий сериал эмас. Аввалига сериал сюжети бошқа лойиҳаларникига ўхшаш ва такрорий туюлади, унда бадавлат шаҳзода ҳамда камбағал ва бахтсиз Золушка ҳаёти тасвирланади. Аммо актёрлар профессионал тарзда ижро этган воқеалар ривожи, ноодатий ғоялар, қаҳрамонларнинг ўз образларини ажойиб тарзда етказиб бериши сюжетни янада жозибали қилади. Натижада томошабин экрандан кўз узолмай қолади ва қаҳрамонлар билан биргаликда воқеаларни бошидан кечиради”, деб ёзади сериал мухлислари.
Лойиҳа неча қисмдан иборат?
Кулгили саҳналар ва соф севги акс этган сериал икки мавсум ва 54 та қисмдан иборат. Машҳур актёр Бариш Ардуч ва жозибали актриса Энчин Сангу ролини қойиллатиб ижро қилган “Ижарага олинган севги”ни доимий равишда томоша қилсангиз, унга деярли 17 кун сарфлашингиз керак бўлади. Лойиҳа бугунги кунда классикага айланди, деб айта олиш мумкин.
Изоҳ (0)