Турк актёр ва актрисалари шахсий ҳаётида рўй бераётган янгиликлар ва улар ҳозирда нималар билан банд экани ҳақида маълумотларни эътиборингизга ҳавола қиламиз.
Ирем Ҳелважиўғлудан янги романтик суратлар
2024 йил октябрь ойида турмуш қурган таниқли актриса Ирем Ҳелважиўғли ва тадбиркор Урал Каспар ижтимоий тармоқларда оилавий ҳаётлари қандай кечаётганини мухлислари билан бўлишишда давом этмоқда.
“Муҳташам юз йил”да канизак Клара образи ва “Сўйла, Қора денгиз” сериалидаги роли ҳамда кинодаги бошқа ижролари билан кўпчиликнинг кўнглидан жой олган Ирем Ҳелважиўғлу турмуш қуриш қарорига келиши учун узоқ вақт ўйлаганини айтиб ўтди. Актрисанинг таъкидлашича, ундан анъанавий тарзда турмуш қуриш учун қўлини сўрашмаган, оила қуриш қарори ўзаро муҳокама ва келишув натижаси бўлган.
Айтач Шашмаз қаллиғи Жемре Байсел билан бирга
Айтач Жемре Байсел билан “Тақдир ўйини” сериалида бошланган муносабатларнинг давом этаётганини тасдиқлади. У Истанбулнинг Кадикўй туманида журналистларга берган интервьюсида бу ерга Жемренинг таклифи билан келганини айтди. Журналистлар томонидан Жемренинг лойиҳаларини кузатасизми, деган саволга Шашмаз ҳа, деб жавоб берди ҳамда қаллиғи билан боғлиқ ҳамма нарсага қизиқишини таъкидлади:
“Албатта, мен Жемре билан боғлиқ барча лойиҳалар ҳақида билишим ва кузатиб боришим керак”.
Энгин Акюрек доимгидек шахсий ҳаётини сир сақламоқда
2015 йилги “Энг яхши эркак роли” учун “Эмми” мукофоти совриндори, “Агар булут бўлсам”, “Харом пул, сохта севги” телесериаллари орқали машҳур бўлган Энгин Акюрек Истанбулнинг Кадикўй туманида журналистларга қисқача жавоб берди.
Журналистларнинг: “Жаноб Энгин. Сизни анча вақтдан бери кўрмадик, бир оз суҳбат қура оласизми?” деган саволига актёр “Хайрли кеч, дўстлар” деди ва тезда ғойиб бўлди. Унинг бундай хатти-ҳаракати актёрнинг характери учун хосдир. Энгин Акюрек шахсий масалаларни матбуот билан муҳокама қилмаслик тамойилига доимо содиқ қолган.
Чингиз Бозкурт ўзининг янги китобини тақдим этди
Машҳур “Лейла” сериалида Селман ролини ижро этган таниқли актёр Чингиз Бозкурт китоб чоп этди. Асардаги баъзи иборалар Туркиянинг “Чамадон” журналида ҳам нашр этилди. Ушбу асарда у ўзининг болалик хотиралари, Лондонда ўтказган саргузаштлари ва 40 йиллик актёрлик карьераси ҳақида фикр юритди. Ўз ҳикояларида Чингиз Бозкурт медиа, сиёсат ва тарих каби муҳим мавзуларга тўхталиб ўтди.
Китобнинг орқа муқовасида актёрнинг ҳаётга бўлган қарашларини акс эттирувчи сатрлар мавжуд:
“Ҳаёт мураккаб бўлиши мумкин, аммо Бозкурт ҳар бир ишга табассум билан боқиш, ўз-ўзини танқид қилиш ва муаммоларга турли нуқтаи назардан қарашга интилади”.
Илкер Аксум ота бўлди
Жорий йил 3 февраль куни “Еттинчи бўлмадаги мўжиза” фильми юлдузи Илкер Аксум ва унинг турмуш ўртоғи Дилай Экмекчиўғлу фарзандли бўлди.
Илкер ва Дилай 2023 йил июнь ойида турмуш қурган эди. Тўйдан кўп ўтмай эр-хотин фарзанд кутаётгани ҳақида хабар берди. Жуфтлик Instagramъда чақалоқнинг сурати билан бўлишди ва пост остида:
“Сизнинг дуоларингиз билан қизалоғимизни бағримизга олдик” дея изоҳ қолдирди.
Мурат Йилдирим ва Имон Элбани Дубайда дам олмоқда
“Қора қиш” номли янги лойиҳага тайёргарлик кўраётган актёр Мурат Йилдирим суратга олиш ишларини бошлашдан аввал дам олишга қарор қилди. Актёр ва унинг рафиқаси Имон Элбани ижтимоий тармоқларда Дубайдаги саёҳати қандай ўтаётгани ҳақида бир нечта суратлар жойлаштирди.
Мерт Рамазон Демир ҳарбий хизматни ўтайди
Айни пайтда “Қўрғон сирлари” сериалининг сўнгги қисмларида суратга тушаётган актёр Мерт Рамазон Демир ҳарбий хизматга кетиш тараддудида эканлиги ҳақида маълумотлар пайдо бўлди. Актёр бунинг учун ариза ҳам топширган.
Актёр муддатли ҳарбий хизмат турини танлади: Мерт Рамазон баҳор ва ёзда армияда хизмат ўтагач, кузга қадар янги лойиҳа учун тайёр бўлади.
Изоҳ (0)