Наманган вилоятида тадбиркор электр энергиясидан ноқонуний фойдаланиб келаётгани аниқланди. Бу ҳақда “Ўзэнергоинспекция” хабар берди.
Унга кўра, ҳолат “Ўзэнергоинспекция” Наманган вилоят ҳудудий бошқармаси ва вилоят прокуратураси билан ҳамкорликда ўтказилган назорат тадбирида аниқланган. Уйчи туманида жойлашган “Э.Ж.А.” якка тартибдаги тадбиркорга қарашли умумий овқатланиш биносида электр ҳисоблагичдан ташқари уланган ҳолда, электр энергиясидан ноқонуний фойдаланган.
Ушбу қоидабузарлик натижасида дастлабки ҳисоб-китобларга кўра электр таъминоти корхонасига 95.8 млн сўмлик зарар етказилгани маълум бўлди.
Мазкур ҳолат юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилди.
Ўзбекистонда 2024 йил 1 декабрдан 2025 йил 15 февралгача 133 млн куб метр газдан ноқонуний фойдаланилган.
Газни ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланилган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Бундан ташқари, Самарқанддаги новвойхонада 621 млн сўмлик газдан ноқонуний фойдаланилди.
Газ ўғирлаётган иссиқхоналар
Тошкент вилоятида 618,4 миллион сўмлик табиий газдан ноқонуний фойдаланган иссиқхона аниқланганди. Шунингдек, Самарқандда 1 миллиард сўмлик табиий газдан ноқонуний фойдаланган иккита иссиқхона фош бўлгани тўғрисида хабар берилганди.
Изоҳ (0)