Андижон вилоятида табиий газдан, Тошкент шаҳрида электр энергиясидан ноқонуний фойдаланиш ҳолати аниқланди. Бу ҳақда Бош прокуратура матбуот хизмати хабар берди.
Маълум қилинишича, Андижон вилояти Хўжаобод туманидаги “Б.Б.Б” МЧЖ раҳбари А.С. жамиятга қарашли бинода ташкил қилинган оҳак цехига ўрнатилган электрон ҳисоблагичнинг тамғасини бузган.
Дастлабки ҳисоб-китобларга кўра, 5,3 млрд сўмлик табиий газдан ноқонуний фойдаланган.
Ҳолат бўйича терговга қадар текширув ҳаракатлари олиб борилмоқда.
Шунингдек, Тошкент шаҳрининг Мирзо Улуғбек туманидаги “С.Т.” МЧЖ мансабдор шахслари ва бошқалар жамиятга қарашли контейнерга 40 дона майнинг қурилмаларини ўрнатиб, қонунга зид равишда майнинг фаолияти билан шуғулланиб келган.
Оқибатда 2,1 млрд сўмлик электр энергиясидан ноқонуний фойдаланилган.
Ҳолатлар юзасидан жамият мансабдор шахслари ва бошқаларга нисбатан жиноят иши қўзғатилган.
Газни ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланилган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Изоҳ (0)