Самарқанд вилоятининг Тойлоқ, Наманган шаҳри ва Андижон вилоятининг Хўжаобод туманларида энергия ресурсларидан ноқонуний фойдаланиш ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Тойлоқ туманида “Н.Б.” МЧЖга қарашли клиника раҳбари С.Х. (муқаддам судланган) тижорат мақсадида умумий фойдаланишдаги газ тармоғига ўзбошимчалик билан уланган. Натижада 194,1 млн сўмлик табиий газдан ноқонуний фойдаланилган.
Шунингдек, Наманган шаҳрида фуқаро Т.А. “Дамбоғ” МФЙ ҳудудидаги новвойхонасида тижорат мақсадида умумий фойдаланишдаги табиий газ тармоғига ўзбошимчалик билан уланган. Оқибатда 176,7 млн сўмлик табиий газдан ноқонуний фойдаланилган.
Бундан ташқари, Хўжаобод туманида фуқаро Н.Я. “Мустақиллик” МФЙ ҳудудидаги хонадонида тижорат мақсадида умумий фойдаланишдаги газ тармоғига ўзбошимчалик билан уланган. Жами 100,8 млн сўмлик табиий газдан ноқонуний фойдаланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)