Англия терма жамоасининг собиқ ярим ҳимоячиси Девид Бекҳэм 2003 йилда “Манчестер Юнайтед” клубидан Мадриднинг “Реал” клубига ўтганидан афсусланишини маълум қилди.
“Мен бутун фаолиятимни ‘Манчестер Юнайтед’да ўтказишни ва ҳеч қаерга кетмасликни истардим, лекин бунинг иложи йўқ эди. Фаолиятим давомида энг кўп афсусланган қарорим – ‘Реал’га ўтишим бўлган”, дея Бекҳэмнинг сўзларини келтиради Players Sayings ижтимоий тармоқдаги саҳифасида.
Девид Бекҳэм профессионал фаолияти давомида “Манчестер Юнайтед”, “Престон”, “Реал Мадрид”, “Лос-Анжелес Гэлакси”, “Милан” ва “ПСЖ” клубларида тўп сурган. Ҳозирда 49 ёшли собиқ футболчи MLSънинг “Интер Майами” клуби президенти ҳисобланади.
“Манчестер Юнайтед”дан “Реал”га йўл
2003 йилда Бекҳэмнинг “Манчестер Юнайтед”даги фаолияти кутилмаганда якунланди. Унинг кетиши бир қатор воқеаларнинг узвий натижаси ҳисобланади. Бу ҳолатлар ўша пайтдаги бош мураббий Сер Алекс Фергюсон ва футболчининг муносабатларини таранглаштирди.
Энг машҳур ҳодисалардан бири 2003 йил февраль ойида содир бўлди. Англия Кубогида “Арсенал”га ютқазганидан сўнг, Фергюсон тасодифан буцани тепиб юборди ва у Бекҳэмнинг қошига тегиб, жароҳат етказди. Бундан ташқари, Бекҳэмнинг тобора ортиб бораётган юлдузлик мақоми ва жаҳон футболидаги ўрни унинг ўйинига ва мураббийнинг қарорларига таъсир қила бошлади.
Охир-оқибат, 2003 йил ёзида Бекҳэм Мадриднинг “Реал” клубига трансфер қилинди. Бу кўпчилик учун кутилмаган қарор бўлса-да, унинг фаолиятида янги саҳифа очди.
Изоҳ (0)