9 ноябрь, душанба куни эрталаб Испаниянинг «Sport.es» нашри шов-шувли янгиликни эълон қилди. Унда ёзилишича, «Ювентус» 2021 йилнинг ёзида Криштиану Роналдуни сотиб юбормоқчи. Бунга сабаб дея Турин клуби коронавирус пандемияси шароитида харажатларни камайтиришнинг турли вариантларини кўриб чиқаётгани айтилмоқда. Тахминларга кўра, клуб Роналдуни сотиш орқали унинг трансфери учун сарфланган маблағнинг маълум бир қисмини қоплашга эришишни режа қилмоқда. Клубдагилар 35 ёшли футболчи билан шартномани узайтириш катта таваккал деб ҳисоблайди. Қуйида Роналдунинг атрофидаги вазият ва унинг қаерларга йўл олиши мумкинлиги ҳақида мулоҳаза юритилади.
Роналдунинг ўйинида пасайиш кузатилдими?
Бу борада (ҳозирча) Криштиану билан ҳаммаси жойида: 2019/20 йилги мавсумда у Италия чемпионатида (33 ўйинда) 31 та, мамлакат Кубогида 2 та, Чемпионлар Лигасида эса 4 та гол урди. Терма жамоада Роналду йилдан йилга яхшиланиб бормоқда: 2019 йил самарадорлик бўйича у учун энг самарали йил ҳисобланади – 14 та гол.
2020/2021 йилги мавсумни ҳам Криш жуда яхши бошлади: «Сампдория»га қарши биринчи тур ўйинида урилган гол ва «Рома» билан ўйиндаги дубль. Шундан сўнг Криштиану ҳозирги замон кишиларининг энг катта душмани – коронавирус инфекциясини мағлуб этиб, бир ойлик танаффусдан кейин ўйинга қайтди ва дарҳол дубль қайд этишга эришди. Ҳозир ҳужумчининг ҳисобида чемпионатнинг 4 ўйинида 6 та гол бор.
Умуман олганда, Роналду «Ювентус»даги фаолияти давомида 94 учрашувда 71 та гол ва 19 та голли узатмага муаллифлик қилган. 35 ёшда бўлишига қарамай, ҳужумчининг статистикаси пасаймаяпти, терма жамоадагиси эса фақат ўсмоқда.
Роналду фаолиятини қаерда давом эттириши мумкин
ПСЖ
Октябрь ойидаёқ Don Balon ПСЖнинг португалияликни «Реал»га ўтиши кутилаётган Килиан Мбаппега идеал ўринбосар сифатида кўраётгани ҳақида хабар берган эди. Французлар бунинг учун «кекса синьора»га 70 миллион евро тўлашга тайёр. Роналдунинг ўзи эса ушбу ўтиш орқали Европа миллий лигаларида «енгилроқ» ғалаба қозониш имкониятини кўрмоқда. Ким билсин, балки парижликлар учун Чемпионлар Лигасини забт этиш учун айнан Роналду етишмаётгандир? ПСЖ бугунги кунда Европадаги юлдузларнинг молиявий эҳтиёжларини қондиришга қодир кам сонли клублардан бири ҳисобланади. Шундай экан, нега энди бу вариант бўлмаслиги керак?
«Манчестер Юнайтед»
«Олд Траффорд»га қайтиш – анча жарангдор янграмоқда. Бироқ тан олиш лозимки, «Манчестер Юнайтед» билан Чемпионлар Лигасида муваффақият қозониш эҳтимоли анча паст, аммо бу эҳтимолий қайтишнинг амалга ошмаслигига аниқ сабаб бўла олмайди. Ҳозирда кўпчилик Роналдуни айнан «қизил иблислар» билан боғламоқда.
Ўтган мавсумда «қизил иблислар» ижобий натижа қайд этди – АПЛда 3-ўрин ва Чемпионлар Лигаси йўлланмаси. Бироқ 2020/21 йилги мавсумда клубда муаммолар етарлича. Бунга жамоанинг ҳимоя чизиғи яққол мисол бўла олади.
Шунга қарамай, ҳужумда Сульшер катта танлови имкониятига эга. У ерда Рашфорд, Марсьяль, Фернандеш ва Гринвуддан ташқари, жамоага яқинда қўшилган Кавани (йилига 10 миллион евро маош билан), Игало, Мата, Лингард, Жеймс каби ҳужумкор футболчилар ҳам ўз имкониятини кутиб ётибди. Эҳтимол, «Юнайтед» ушбу трансферни амалга оширар ҳам, аммо унга яна бир юқори маошли (бу пулларга яхши икки нафар ҳимоячи сотиб олиш мумкин) ҳужумчининг нима кераги бор...
MLS
Роналду MLS’ни ёқтириши ҳақида бир неча бор гапирган. «АҚШ – ажойиб мамлакат. У ерда инсонлар футбол ўйнаш учун тегишли менталитет ва шароитга эга. Улар футбол учун қўлларидан келган барча ишни қилмоқда ва ҳали бундан ҳам кўпроқ нарсани қилиш мумкин. Агар мен ушбу мамлакатда футболни ривожланишига кўпроқ ёрдам бера олсам, буни қилишга тайёрман. Умид қиламанки, бир кун келиб MLS’да ўйнашни бошлайман», – деганди Роналду 2015 йилда.
Бир йил ўтгач, Роналду яна Америка мавзуси ва унда ўйнаш истаги борлиги мавзусига тўхталди: «MLS’да бўлаётган воқеалар ақлга сиғмайди. Балки келажакда у ерда ўйнаш учун яхши имкониятга эга бўларман. Ҳеч қачон келажакни олдиндан айта олмайсиз, аммо бу менда бошқача бир ҳиссиёт уйғотмоқда. Албатта, мен ушбу вариантни кўриб чиқяпман. Айтганимдек, у ерда футбол тобора яхшиланиб бормоқда, нега буни қилмаслигим керак? Менимча, буни амалга оширса бўлади.
Биламан, кўплаб футболчилар MLS’га ўтмоқда. Лига яхшиланмоқда. У ўсиб бормоқда, бу, албатта, яхши. Бу мен ва бир кун келиб, у ерга кўчиб ўтишни истайдиган ёш футболчилар учун яхши ҳолат. У ерда футбол ривожланиб бораётгани ажойиб».
2020 йилнинг ёзида Роналдунинг Португалия ва «Манчестер Юнайтед»даги собиқ жамоадоши Нани ҳужумчининг истаги ҳақида гапирар экан, қуйидаги сўзларни айтганди: «Бир неча йил олдин Роналду менга фаолиятини Америкада якунлаши мумкинлигини айтганди. Бу 100 фоиз эмас, балки эҳтимолий ҳолатдир. Унда бундай имконият бор».
Яна шуни қайд этиш керакки, Криштиану MLS’даги «Интер Майами» клуби хўжайини Дэвид Бекҳэм билан яхши муносабатларга эга. Балки бу клуб португалиялик ҳужумчининг шарафли фаолиятидаги сўнгги жамоа бўлар. Маркетинг ва бизнес нуқтаи назаридан ушбу вариант ҳар иккала собиқ «реалчилар» учун ютуқ бўлиб кўринмоқда. Дарвоқе, Мадрид клубининг амалдаги сардори Серхио Рамос ҳам агар «Реал» билан янги шартнома борасида келиша олмаса, бутсаларини айнан АҚШда михга илиш вариантини кўриб чиқмоқда.
Нима бўлганда ҳам буёғига нима бўлишини фақат ва фақат вақт кўрсатади, булар эса шунчаки тахмин ва мулоҳазалар эди.
- Криштиану Роналдунинг Португалия терма жамоаси сафида ЖЧ саралаш босқичларида урган барча голлари (видео)
- Криштиану Роналдунинг «Реал» сафидаги шедевр голлари (видео)
- Криштиану Роналдунинг «Реал» сафида жарима зарбасидан урган барча голлар (видео)
Мавзуга доир: Bugatti, Ferrari, Lamborghini ва Rolls-Royce. Криштиану Роналдунинг гаражига саёҳат (фото)
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!