Нуфузли Transfermarkt онлайн портали Португалия терма жамоаси ва Саудиянинг “Ан-Насср” клуби ҳужумчиси Криштиану Роналдунинг бозор қийматини янгилади.
Эндиликда 39 ёшли футболчи сайт томонидан 12 миллион еврога баҳоланмоқда. Унинг аввалги нархи 15 миллион евро эди.
Жорий мавсумда Роналду барча мусобақаларда 19 та учрашувда қатнашиб, 16 та гол ва 3 та голли узатмани амалга оширди. Футболчининг клуб билан амалдаги меҳнат шартномаси 2025 йилнинг ёзига қадар амал қилади.
Эслатиб ўтамиз, Криштиану Роналду расмий ўйинларда 916 та гол урган тарихдаги биринчи футболчига айланганди. Роналду “Спортинг” сафида 5 та, “Манчестер Юнайтед”да 145 та, “Реал”да 450 та, “Ювентус”да 101 та, “Ан-Насср”да 81 та ва миллий терма жамоа сафида 134 та гол урган. Бундан ташқари, ҳужумчи миллий терма жамоа, Европа чемпионати, Чемпионлар Лигаси ва клублар ўртасидаги жаҳон чемпионати тарихидаги энг яхши тўпурар ҳисобланади.
“Барселона”нинг собиқ футболчиси Мессининг янги нархи 20 миллион еврони ташкил этмоқда. Сентябрда у 25 миллион еврога баҳоланган эди.
Аввалроқ Transfermarkt портали Франция чемпионатида ҳаракат қилаётган футболчиларнинг нархини янгилаган эди. Унга кўра, “Ланс” клуби ва миллий жамоа ҳимоячиси Абдуқодир Ҳусановнинг нархи 12 миллион еврога етди ва Ўзбекистоннинг энг қиммат футболчисига айланганди. Шундай қилиб футбол юлдузи Роналду ва Абдуқодир Ҳусановнинг нархи тенглашди.
Изоҳ (0)