Angliya terma jamoasining sobiq yarim himoyachisi Devid Bekhem 2003-yilda “Manchester Yunayted” klubidan Madridning “Real” klubiga o‘tganidan afsuslanishini ma’lum qildi.
“Men butun faoliyatimni ‘Manchester Yunayted’da o‘tkazishni va hech qayerga ketmaslikni istardim, lekin buning iloji yo‘q edi. Faoliyatim davomida eng ko‘p afsuslangan qarorim – ‘Real’ga o‘tishim bo‘lgan”, deya Bekhemning so‘zlarini keltiradi Players Sayings ijtimoiy tarmoqdagi sahifasida.
Devid Bekhem professional faoliyati davomida “Manchester Yunayted”, “Preston”, “Real Madrid”, “Los-Anjeles Gelaksi”, “Milan” va “PSJ” klublarida to‘p surgan. Hozirda 49 yoshli sobiq futbolchi MLS’ning “Inter Mayami” klubi prezidenti hisoblanadi.
“Manchester Yunayted”dan “Real”ga yo‘l
2003-yilda Bekhemning “Manchester Yunayted”dagi faoliyati kutilmaganda yakunlandi. Uning ketishi bir qator voqealarning uzviy natijasi hisoblanadi. Bu holatlar o‘sha paytdagi bosh murabbiy Ser Aleks Fergyuson va futbolchining munosabatlarini taranglashtirdi.
Eng mashhur hodisalardan biri 2003-yil fevral oyida sodir bo‘ldi. Angliya Kubogida “Arsenal”ga yutqazganidan so‘ng, Fergyuson tasodifan butsani tepib yubordi va u Bekhemning qoshiga tegib, jarohat yetkazdi. Bundan tashqari, Bekhemning tobora ortib borayotgan yulduzlik maqomi va jahon futbolidagi o‘rni uning o‘yiniga va murabbiyning qarorlariga ta’sir qila boshladi.
Oxir-oqibat, 2003-yil yozida Bekhem Madridning “Real” klubiga transfer qilindi. Bu ko‘pchilik uchun kutilmagan qaror bo‘lsa-da, uning faoliyatida yangi sahifa ochdi.
Izoh (0)