«Барселона» ҳужумчиси Лионель Месси ва «Атлетико» форварди Луис Суарес яна битта клуб сафида тўп суриши мумкин, дея хабар қилмоқда Goal.
Месси ва Суаресда «Интер Майами»да биргаликда тўп суриш имконияти бор. Бироқ бу ҳодиса 2022 йилнинг ёзидан эрта рўй бериши эҳтимоли кам.
Майами клубининг эгаларидан бири «Манчестер Юнайтед» ва «Реал» собиқ ярим ҳимоячиси Дэвид Бекҳэм ҳисобланади.
Аввалроқ Месси фаолиятини MLS клубида давом эттириш ва АҚШда истиқомат қилишга қарши эмаслигини маълум қилганди.
Аргентиналик футболчи жорий мавсум «Барселона» сафида 18 ўйин ўтказиб, 10 гол ва бешта голли узатма муаллифига айланди. Унинг «кўк-анорранглилар» билан амалдаги шартномаси 2021 йилнинг 30 июнига қадар мўлжалланган.
Уругвайлик ҳужумчи эса 2020/21 йилги мавсум Мадрид шаҳри жамоасида 14 ўйин ўтказди. Унда Суарес 7 гол урди ва битта голли узатма амалга оширди. Унинг «Атлетико» билан шартномаси 2022 йилнинг ёзигача кучда қолади.
Эслатиб ўтамиз, бу икки футболчи 2014—2020 йиллар оралиғида каталон клубида бирга тўп сурган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)