Жорий йилнинг октябрь ойида Netflix англиялик футболчи Девид Бекҳэм ҳақида ҳужжатли фильмни намойиш этди.
Унда Бекҳэмнинг футбол оламига кириб келгани, “Манчестер Юнайтед”да ёқимтойга айланган, Аргентина терма жамоасига қарши баҳсдаги қизил карточкаси мухлислар нафратига сабаб бўлгани, “Реал” эса у учун яна бир синов бўлгани баён этилган.
Умуман футболчилар ҳақидаги ҳужжатли ёки бадиий фильмлар доим мухлислар томонидан илиқ кутиб олинади. Бекҳэм ҳақидаги фильм баҳона жаҳон кино ижодкорлари томонидан суратга олинган футбол ҳақидаги энг яхши фильмларни ёдга оламиз.
“Бекҳэм”, / Beckham (2023, АҚШ)
“Манчестер Юнайтед” ва “Реал”нинг собиқ футболчиси, ҳозирда Лионель Месси тўп сураётган “Интер Майами” клуби хўжайинларидан бири бўлган Девид Бекҳэм ҳақидаги 4 қисмлик ҳужжатли сериал.
Сериал давомида Бекс ўзининг ўтмишига назар солади, архив ҳужжатларига изоҳ беради ва рафиқаси Виктория унинг ҳаётида қанчалик муҳим ўринга эга эканлигини таърифлаб беради. Сериалда, шунингдек, Бекҳэмнинг дўстлари, собиқ жамоадошлари ва мураббийларини ҳам кўриш мумкин. Эрик Кантона, сер Алекс Фергюсон, Пол Скоулз, Луиш Фигу, Роналдо, Карлуш Кейруш, Фабио Капелло ва Флорентино Переслар Девид билан боғлиқ хотираларни ёдга олади.
“Гол” / Goal! (2005, АҚШ)
Лос-Анжелеслик боғбоннинг ўғли, профессионал футболчи бўлишни орзу қилган Сантяго Мунесга ҳақида трилогия.
Барча қийинчиликлардан сўнг Сантяго муваффақиятга эришади — у “Ньюкасл” аъзосига айланади ва кейинги қисмларда “Реал” либосини кияди. Фильм голливуд қонунларига мувофий ФИФА ҳомийлигида суратга олинган ва Америка орзуси амалга ошиши ҳақидаги ҳикоянинг классик намуналаридан бири ҳисобланади.
Фильмнинг уч қисмида Рауль, Бекҳэм, Анри, Зидан, Роналдо, Касиляси каби кўплаб футбол юлдузлари иштирок этган. Табиийки, улар ўз-ўзини ўйнаган.
“Эрикни излаб” / Looking for Eric (2009. Буюк Британия, Франция, Италия, Бельгия, Испания)
Эрик — ёши катта почтачи ва “Манчестер Юнайтед”нинг ашаддий мухлиси. У “Олд Траффорд”да жамоа етакчиси, ўзининг адаши бўлган Эрик Кантонанинг ўйинини томоша қилган соатларини ҳаётининг энг яхши лаҳзалари деб билади.
Ҳаёти барбод бўлса бошлагач, ишдаги ва оилавий муаммолар сабаб, руҳий тушкунликка туша бошлагач, унинг кўзига Кантона кўрина бошлайди ва афсонавий ўйинчи унга футбол фалсафасини ҳаёт билан уйғунлаштиришни ўргатади.
“Лаънатланган Юнайтед” / The Damned United (2009, Буюк Британия)
Фильм реал воқеаларга асосланган. Кинонинг асосий қаҳрамони “Лидс Юнайтед”ни 44 кун бошқарган Брайан Клаф ҳисобланади.
Лавозимга келгунга қадар у бир неча бор клубнинг ўйинини ва мураббийини танқид остига олган. Футболчилар эса буни кечира олмаган. Воқеалар бундан анча олдин бўлиб ўтган бўлса-да, у ҳамон актуал. Фильмда жамоа ичидаги ва унинг атрофидаги муносабатларнинг нозик жиҳатлари, ўйинчилар ҳамда жамоанинг психологияси — барчасининг машаққати, тушунарли, жуда ҳаяжонли тарзда кўрсатиб берилган.
“Пеле” / Pele (2021, Буюк Британия)
Фильм Пеленинг болалик ҳаётидан то фаолиятидаги сўнгги клуб бўлган “Нью-Йорк Космос” жамоасига қадар йўлини ёритиб беради. Унда кўплаб архив тасвирларни, жумладан, Пеленинг ўйинлари, интервьюлари, янгилик роликларини ва бошқаларни кўриш мумкин.
Шунингдек, фильм Бразилиядаги сиёсий аҳвол, диктатурага ҳам тўхталиб ўтган.
Пеле ҳақида жуда кўплаб ҳужжатли фильмлар ишланган. Лекин 2021 йилда тақдим этилган кинода унинг нафақат футболдаги, балки унинг ташқарисидаги ҳаёти ҳам мукаммал очиб берилган.
Бразилиялик афсона 2022 йил 29 декабрь куни 82 ёшида вафот этди.
Изоҳ (0)