АҚШ президенти Жо Байден ўзининг ташқи сиёсати орқали Россияни Хитой билан иттифоқ тузишга ундади. Бу ҳақда Американинг собиқ президенти Дональд Трамп Аёва штатидаги митингда айтди.
“Байден маъмурияти Россияни тўғридан тўғри Хитой қўлига тутқазди. Буни қабул қилиш мумкин эмас. Байден айнан шундай қилди. Энди уларда катта ва чиройли иттифоқ бор. Улар Россияни бевосита Хитой қўлига тутқазди. Хитой учун бу боладан конфетини олиб қўйгандек бўлди”, — деди Трамп.
Сиёсатчи Байден айнан қаерда хато қилганига аниқлик киритмади.
Собиқ президент ўзини учинчи жаҳон урушининг олдини олишга қодир бўлган АҚШ президентлигига ягона номзод деб атади.
“Мен буни ваъда қила оладиган ягона номзодман. Мен учинчи жаҳон урушининг олдини оламан, чунки ишончим комил, сизда учинчи жаҳон уруши бўлади”, — дея давом этди Трамп. Сиёсатчи бундай можаро хавфини реал деб атади.
Трамп ўтган йилнинг ноябрида 2024 йилда бўлиб ўтадиган навбатдаги президентлик сайловларида иштирок этиш ниятини маълум қилганди. Январь ойининг охирида у сайловолди ташвиқотини бошлади.
Қўшма Штатларнинг собиқ президенти 2020 йилги сайловларда ўзи ютқазган рақиби Байденни бир неча бор танқид қилган. Украинадаги уруш ва Байден маъмуриятининг бу мамлакатга нисбатан ҳаракатлари учинчи жаҳон урушига олиб келиши мумкин, дейди у ва Оқ уйни “эҳтиёткорликка” чақиради. Трамп, шунингдек, агар у АҚШ президенти бўлганида Украинадаги инқироз рўй бермаслигини таъкидлайди.
Изоҳ (0)