Агар Европа ва НАТО мамлакатларини халқаро ҳамжамият ва Украинадаги низо иштирокчилари деб ҳисобласак, бўлаётган воқеаларни учинчи жаҳон уруши деб аташ мумкин. Бу ҳақда Чеченистон раҳбари Рамзан Қодиров ижтимоий тармоқлардаги тўғридан-тўғри эфир чоғида айтиб ўтди.
Шунингдек, Қодиров Европа мамлакатларида муаммолар кузатилаётганини айтди. У ерда митинглар бўлиб ўтмоқда, раҳбарлар ишдан олинмоқда, деди Чеченистон раҳбари ва Россияда, аксинча, «ҳеч қандай муаммолар йўқ, президент учрашувлар, йиғилишлар ўтказяпти, ўз ишини қиляпти» дея қўшиб қўйди.
Бироқ кейинроқ ўз Telegram-каналида пост ёзиб, Россия махсус операциясига жаҳон уруши мақомини бериш ноўрин экани, чунки «дунё НАТОдан иборат эмаслиги»ни, Хитой, Ҳиндистон, Покистон каби кўплаб йирик мамлакатлар бетарафликни сақлаётганини айтди. Унинг сўзларига кўра, у тўғридан-тўғри эфирда шу ҳақда гапирган.
«Агар кимдир ‘бутун дунё ҳамжамияти’ Россияга қарши деб ҳисобласа ва фақат НАТОни ‘дунё ҳамжамияти’ деб билса, буни жаҳон уруши деб ҳисоблайверсин», — деб ёзди Чеченистон раҳбари.
АҚШ, Европа мамлакатлари ва НАТО Украинада Россия махсус операцияси бошланганидан кейин Киевга ҳарбий кўмакни кучайтириб, қурол-яроғ ва ҳарбий техника етказиб беришни бошлади, аммо улар низода иштирок этмаётганини маълум қилди. Хусусан, Европа дипломатияси раҳбари Жозеп Боррел Евроиттифоқ уруш томонларидан бири эмаслигини айтган ва «Бундай бўлмаяпти ва бўлмайди ҳам», — деган эди.
АҚШ низода қатнашмаслиги ва у ерда парвозлар тақиқланган ҳудуд яратмаслиги ҳақида Пентагон раҳбари Ллойд Остин ҳам айтиб ўтганди. Вашингтон, унинг сўзларига кўра, Киевга ҳарбий ёрдам беришга ва НАТО ҳудудларини ҳимоя қилишга эътиборини қаратади.
Изоҳ (0)