Словакия бош вазири Роберт Фицо лавозимида қолар экан, мамлакат Украинанинг НАТОга аъзо бўлишига розилик бермаслигини маълум қилди.
“Мен партия раиси сифатида сиёсий назоратимдаги депутатларга Украинанинг НАТОга қўшилишига ҳеч қачон рози бўлмаслигини буюраман”, деди у.
Словакия бош вазири Украинанинг Европа иттифоқига қўшилишига қарши эмаслигини, бироқ унинг Шимолий Атлантика альянсига қўшилиши “учинчи жаҳон уруши учун асос бўлиб хизмат қилишини” айтган. Фицонинг сўзларига кўра, Украинадаги уруш “русларни тиз чўктириш” мақсадида “Ғарб томонидан қўллаб-қувватлангани” учунгина давом этмоқда.
Фицо, шунингдек, 2025 йилда Иккинчи жаҳон уруши тугаганининг 80 йиллиги муносабати билан Москвага ташриф буюришни режалаштираётганини маълум қилган.
“Илтимос, руспарастликдан азият чекмайлик. Қизил армия ёки собиқ Совет иттифоқи ҳақида ижобий гапирганимизда, бизни автоматик равишда Путиннинг агенти деб атаманг”, деди Словакия бош вазири.
Аввалроқ Фицо Россия билан урушдан кейин муносабатларни тиклаш тарафдори эканини айтган. Сиёсатчига кўра, агар Украинадаги уруш ҳозирги Словакия ҳукумати ваколати даврида, яъни 2027 йилгача якунланса, у Европа иттифоқи ва Россия ўртасидаги “иқтисодий ва нормал” муносабатларни тиклаш учун ҳаракат қилишини маълум қилган.
Словакия бош вазирининг сўзларига кўра, Братислава Украина билан ҳам дўстона муносабатлардан жуда манфаатдор.
Financial Times нашри кўплаб Ғарб ва Украина расмийлари гўёки урушни тугатиш учун “Россия томонидан босиб олинган ҳудудлар НАТОга аъзо бўлиш эвазига” схемасини кўриб чиқаётгани ҳақида хабар берган.
“Бу ерлар келажакда дипломатик йўллар билан қайтарилиши кераклиги тўғрисида яширин келишув мавжуд”, дея таъкидлаган нашр.
Изоҳ (0)