Америка Қўшма Штатлари Исроилга 7 миллиард долларлик қурол-яроғ, жумладан, самолёт учун бомбалар, бошқариладиган ракеталар ва бошқа тегишли жиҳозлар етказиб беради.
Бу ҳақда Пентагон АҚШ президенти Дональд Трамп ва Исроил бош вазири Биньямин Нетаньяху учрашуви якунларига таяниб маълум қилди.
“Қўшма Штатлар Исроил хавфсизлигини таъминлаш тарафдори. Бу АҚШ миллий манфаатлари учун асосий жиҳат ҳисобланади. Таклиф этилаётган битимлар Исроилга ўзининг мудофаа қобилиятини мустаҳкамлаш ҳамда ҳозирги ва келажакдаги таҳдидларга қарши туришга тайёрлигини ошириш имконини беради”, деди Пентагон.
Исроил мудофаа кучлари учун 3 мингта АGM-114 Hellfire ҳаво-ер бошқариладиган ракеталари, шунингдек, 2 мингдан ортиқ ГБУ-39/Б кичик диаметрли бомбалар, 2,8 минг МК 82 кучли портловчи бомба ва 13 минг JDAM тўпламлари тақдим этилади.
Аввалроқ АҚШ Нетаньяху туфайли Халқаро жиноий судга санкциялар киритгани хабар қилинганди.
Трампнинг 6 февраль куни имзолаган фармони АҚШ томонидан молиявий ва виза чекловларини назарда тутади. У АҚШ фуқаролари ва иттифоқчиларига қарши суд терговларини қўллаб-қувватловчи ХЖСнинг мансабдор шахслари ва уларнинг оила аъзоларига қўлланилади.
Изоҳ (0)