АҚШ президенти Дональд Трамп администрацияси Конгрессдан Исроилга 1 миллиард долларлик ҳарбий ёрдам кўрсатишни маъқуллашини сўрайди. Бу ҳақда манбаларга таяниб, The Wall Street Journal хабар берди.
Ёрдам пакетига қиймати 700 миллион долларлик 450 килограммлик 4,7 мингта бомба ва Caterpillar компаниясининг 300 миллион долларлик зирҳли бульдозерлари кириши мумкин. Бу бульдозерлар аввалроқ Исроил ҳукумати томонидан фаластинликларнинг уйларини бузиш учун ишлатилган.
Қурол савдосининг Конгресс томонидан маъқулланиши битим суммаси чегарадан ошган ҳолларда талаб қилинади. Бундай ҳолларда Давлат департаменти Вакиллар палатаси ва Сенатнинг ташқи ишлар бўйича қўмиталарига маълумот юборади ва шартнома тузиш учун Конгресснинг розилиги олиниши керак.
2 февраль куни Исроил бош вазири Биньямин Нетаньяху АҚШга келди. Унинг Трамп билан учрашуви 4 февралга белгиланган. Исроил бош вазири идораси аввалроқ Нетаньяху Трамп иккинчи президентлик муддати давомида Вашингтонга таклиф қилган биринчи хорижий етакчи эканини таъкидлаганди.
3 февраль куни Нетаньяху АҚШнинг Яқин Шарқ бўйича махсус вакили Стив Уиткофф билан ҲАМАС билан келишув бўйича учрашув ўтказди. Axios манбаларига кўра, Исроил бош вазири АҚШ президенти билан учрашувда ўт очишни тўхтатишнинг биринчи босқичи тугаганидан сўнг ҲАМАСга қарши жангларни давом эттириш учун рухсат олиши мумкин.
Изоҳ (0)