Эрон президенти Иброҳим Раисий Исроилнинг Эронга қарши ҳар қандай ҳарбий ҳаракати Исроилнинг Тель-Авив ва Ҳайфа шаҳарларини “вайрон қилиш”га олиб келишидан огоҳлантирди. Бу ҳақда Ал Arabia хабар берди.
Раисий Эрон армияси куни муносабати билан бўлиб ўтган ҳарбий парадда нутқ сўзлади.
“Душманлар, хусусан, сионистик режимнинг, Эронга қарши энг кичик бир ҳаракати ҳарбийларнинг жавобига ва Ҳайфа, Тель-Авивнинг вайрон бўлишига олиб келиши ҳақидаги хабарни олди”, — деди Эрон раҳбари.
Теҳрон бир неча бор Исроилни Эроннинг ядровий иншоотлари ва олимларига қилинган ҳужумда айблаган. Исроил эса Эронни ядровий қурол яратишга уринишда айблайди, Теҳрон буни рад этади. Исроил Эроннинг ядровий дастурини чеклашда дипломатик саъй-ҳаракатлар муваффақиятсизликка учраса, ҳарбий чоралар кўриши ҳақида бир неча бор огоҳлантирган.
Душанба куни Исроил ташқи ишлар вазири Эли Коэн Хитойни Эронга ядровий қурол яратишга йўл қўймаслик учун ўз “таъсири”дан фойдаланишга ундади. Исроил Ислом Республикасининг ядровий давлатга айланишининг олдини олиш учун барча зарур чораларни кўришини билдирди.
Хитой аъзо бўлган 2015 йилги ядровий келишувни қайта тиклашга қаратилган саъй-ҳаракатлар ўтган йилдан бери тўхтаб қолган. Келишув Эронни ядровий дастурига нисбатан қаттиқ, аммо вақтинчалик чекловлар эвазига халқаро санкциялардан озод қилишни таклиф қилган.
Келишув 2018 йилда собиқ президент Дональд Трамп даврида АҚШ ундан чиққанидан кейин бузилди.
Армия куни муносабати билан ўтказилган маросимда Раисий АҚШ аскарларини Яқин Шарқни тарк этишга ҳам чақирди.
“Хорижий кучларнинг мавжудлиги минтақа хавфсизлигига таҳдид солади, аммо Эрон қуролли кучлари қаерда бўлмасин хавфсизликни таъминлайди. Улар қанчалик тезроқ кетишса, минтақа аҳолиси учун шунчалик яхши бўлади”, — деди Раисий.
Изоҳ (0)