Америкалик миллиардер Илон Маск раҳбарлик қиладиган АҚШ Давлат бошқаруви самарадорлиги департаменти (DOGE) ходимлари миллионлаб давлат хизматчиларининг махфий маълумотларига кириш ҳуқуқига эга бўлди, деб ёзади Washington Post газетаси манбаларга таяниб.
Нашрнинг таъкидлашича, гап АҚШ кадрлар хизмати бошқармасидан олинган маълумотлар ҳақида кетмоқда, улар манзиллар, иш ҳақи, ижтимоий суғурта рақамлари, турли идора ходимларининг исмлари ҳақидаги махфий маълумотларни ўз ичига олади.
Давлат бошқаруви самарадорлиги департаменти агентлари хавфсизлик соҳасида муҳим лавозимларни эгаллаган миллионлаб давлат хизматчилари, жумладан, ғазначилик ва давлат департаменти амалдорлари ҳақидаги қатъий чекланган ҳукумат ёзувларига кириш имкониятига эга бўлди, дейди маълумотлардан хабардор бўлган тўрт нафар исми ошкор этилмаган америкалик амалдор.
Уларнинг таъкидлашича, департамент ходимлари маълумотларга киришнинг шундай даражасига эгаки, бу идора ходимлари ҳақидаги маълумотларни нусхалаш ёки ўзгартириш имконини беради. Нашр билан суҳбатда кадрлар хизмати бошқармасининг исми ошкор этилмаган икки амалдори АҚШ президенти Дональд Трампнинг инаугурацияси куни Давлат бошқаруви самарадорлиги департаментининг камида олти нафар ходими барча кадрлар бошқарув тизимларидан кенг фойдаланиш имкониятига эга бўлган.
Улар қайсидир ходимнинг папкасида янги файл яратиши, қайдларни ўзгартириши мумкин бўлган. Улар маълум бир қайдни маълумотлар базасидан ўчириб ташлаши, барча ҳозирги ёки собиқ ходимлар ҳақидаги маълумотларни ўзларига экспорт қилиши ёки бошқа мамлакатга юбориши мумкин эди, дея қўшимча қилди амалдорлардан бири.
Нашрнинг таъкидлашича, амалдорларнинг ҳеч бири Маскнинг департаменти ходимлари “бундай ишлар билан шуғулланганини” кўрмаган. Бироқ расмийлар бундай даражадаги маълумотлардан хавотир билдирган.
Аввалроқ Bloomberg Маск бошчилигидаги DOGE мутахассислари фирибгарлик ва самарасиз харажатларни аниқлаш мақсадида Medicare ва Medicaid (CMS) марказларининг тўлов ва шартнома тизимларига киришганини маълум қилган эди.
Трамп аввалроқ Маск ва тадбиркор Вивек Рамасвами “беҳуда сарф-харажатларни камайтириш ва федерал агентликларни қайта ташкил этиш” учун мўлжалланган давлат самарадорлигига эришиш бўйича янги департаментга раҳбарлик қилишини эълон қилган эди. Кейинчалик Рамасвами DOGE раҳбариятидан кетишини маълум қилди. ABC News телеканали хабарига кўра, у тез орада Оҳаё штати губернатори лавозимига номзодини қўйиш режаларини эълон қилиши мумкин.
Изоҳ (0)