АҚШ президенти Дональд Трамп Мексика президенти Клаудия Шейнбаум билан телефон орқали суҳбат қилди.
Шейнбаумнинг маълум қилишича, ушбу суҳбатдан сўнг Вашингтон Мексика учун божларни бир ойга тўхтатишини эълон қилди.
Президент Трамп билан муносабатларимиз ва суверенитетимизга катта ҳурмат кўрсатилган ҳолда яхши суҳбат ўтказдик, бир қатор келишувларга эришдик. Божлар бугундан бошлаб бир ойга тўхтатилади, деб ёзди у Х ижтимоий тармоғида.
Трамп томонидан Канада ва Мексикадан импорт қилинадиган маҳсулотларга 25 фоизлик, Хитойдан келтирилган товарларга эса илгари жорий этилган йиғимларга қўшимча равишда 10 фоизлик бож белгиланган эди. Мексика, Канада ва Хитойдан келтирилган товарларга тарифлар 4 февраль кунидан кучга кириши кутилаётганди. Республикачи бу қарорни ноқонуний миграция ва синтетик фентанил гиёҳванд моддаси контрабандасига қарши кураш билан асослаган эди.
Шейнбаум ва Трамп ўртасида эришилган келишув бир неча банддан иборат. Биринчидан, Мексика мамлакатдан АҚШга ноқонуний гиёҳванд моддалар, хусусан фентанил етказиб берилишининг олдини олиш мақсадида Миллий гвардиянинг 10 минг нафар аскари ёрдамида зудлик билан шимолий чегарани қўриқлашни кучайтиради. Қўшма Штатлар эса, ўз навбатида, Мексикага ноқонуний қурол-яроғ етказиб берилишининг олдини олиш мажбуриятини олади.
Бугундан бошлаб жамоаларимиз икки йўналишда иш бошлайди: хавфсизлик ва савдо, дея маълум қилди Шейнбаум.
Трамп ҳам ўзининг Truth Social ижтимоий тармоғида Мексика учун тарифларни жорий этиш бир ойга кечиктирилишини тасдиқлади.
Шу вақт мобайнида биз давлат котиби Марко Рубио, молия вазири Скотт Бессент ва савдо вазири Говард Латник, шунингдек Мексиканинг юқори мартабали вакиллари раҳбарлигида музокаралар олиб борамиз, деб ёзди у.
Трамп Шейнбаум билан бўлган суҳбатни “дўстона” деб таърифлади.
Мен президент Шейнбаум билан ушбу музокараларда иштирок этиш имкониятини интиқлик билан кутмоқдаман, чунки биз икки давлат ўртасида битимга эришишга ҳаракат қилмоқдамиз, дея қўшимча қилди АҚШ президенти.
Изоҳ (0)