Халқаро жиноий суд (ХЖС) 21 ноябрь куни Исроил бош вазири Биньямин Нетаньяху ва собиқ мудофаа вазири Йоав Галантни ҳибсга олишга ордер берганди. АҚШ президенти Дональд Трамп мазкур ордерга жавобан ХЖСга қарши санкциялар жорий этиш тўғрисидаги фармонни имзолади.
Трампнинг 6 февраль куни имзолаган фармони АҚШ томонидан молиявий ва виза чекловларини назарда тутади. У АҚШ фуқаролари ва иттифоқчиларига қарши суд терговларини қўллаб-қувватловчи ХЖСнинг мансабдор шахслари ва уларнинг оила аъзоларига қўлланилади.
Ҳужжатда айтилишича, ХЖС АҚШ ва Исроилга қарши “ноқонуний ва асоссиз ҳаракатлар содир этган” ва “қонуний асосларсиз ўз юрисдикциясини эълон қилган ҳамда Қўшма Штатлар фуқаролари ва уларнинг баъзи иттифоқчилари, жумладан Исроилга нисбатан дастлабки тергов бошлаган”. Трамп суд “ўз ваколатларини янада кўпроқ суиистеъмол қилиб”, Исроил бош вазири ва собиқ мудофаа вазирини ҳибсга олишга “асоссиз ордерлар” берганини айтди.
Бундан ташқари, АҚШ президенти Вашингтон ҳам, Исроил ҳам ХЖС юрисдикциясига кирмаслигини таъкидлади. Унга кўра, Гаагадаги суднинг ҳаракатлари Қўшма Штатлар “суверенитетига тажовуз қилади ва мамлакат миллий хавфсизлиги ҳамда ташқи сиёсати соҳасидаги ишларга таҳдид” солади.
АҚШ Вакиллар палатаси ХЖСга қарши санкцияларни маъқуллади
2024 йил июнь ойида АҚШ Конгресси Вакиллар палатаси Республикачилар партияси томонидан ишлаб чиқилган ХЖСга қарши санкциялар жорий этиш тўғрисидаги қонун лойиҳасини маъқуллади.
Ўшанда Вакиллар палатаси спикери Майк Жонсон бу ҳужжат суд томонидан Исроил бош вазири Биньямин Нетаньяху ва мудофаа вазири Йоав Галантни ҳибсга олиш учун ордер сўровига жавоб эканини таъкидлаганди.
“АҚШ Исроил томонида қатъий туради ва халқаро бюрократларнинг Исроил раҳбариятини у содир этмаган жиноятлар учун асоссиз ҳибсга олишга ордер беришига йўл қўймайди”, деган Жонсон.
АҚШ Трампнинг биринчи президентлиги даврида ХЖСга қарши санкциялар киритган
2019 йилда АҚШ Афғонистондаги операция чоғида Америка фуқароларига қарши тергов олиб борган ХЖС ходимларига мамлакатга киришни тақиқлаганди. Ўшанда суд америкалик аскарлар ва махсус хизматлар ходимларини Яқин Шарқ мамлакатида қийноқлар қўллаганликда гумон қилганди.
2021 йилда АҚШ собиқ президенти Жо Байден биринчи президентлик муддати давомида Трамп маъмурияти томонидан ХЖС ходимларига нисбатан жорий этилган санкцияларни бекор қилган.
Изоҳ (0)