Сериал ва фильмлардаги меҳмонхоналар барчаси ҳам истеъдодли декораторларнинг меҳнат маҳсули эмас. Уларнинг кўпчилиги ҳақиқатда ҳам мавжуд. Қуйида севимли фильм қаҳрамонлари ташриф буюрган ва энг кўп муҳокама қилинадиган ҳашаматли меҳмонхоналар рўйхатини тўпладик.
“Тахтлар ўйини” сериалидаги Excelsior меҳмонхонаси
Hotel Excelsior — Хорватиянинг Дубровник шаҳридаги нуфузли 5 юлдузли меҳмонхона бўлиб, 1913 йилда қурилган тарихий вилла ва замонавий бинолардан иборат. Меҳмонхона UNESCO мероси рўйхатига киритилган Эски шаҳар деворларидан атиги 5 дақиқалик пиёда масофада жойлашган.
Меҳмонхонада 158 та замонавий жиҳозланган хоналар мавжуд бўлиб, уларнинг кўпчилиги балкон ва денгиз манзарасига эга. Шунингдек, 850 квадрат метр майдонга эга ҳашаматли спа маркази, ёпиқ бассейн, сауна ва фитнес маркази меҳмонлар хизматида. Меҳмонхонада учта ресторан фаолият кўрсатади.
Hotel Excelsior’да қиролича Елизавета II, Ричард Буртон, Элизабет Тейлор каби машҳурлар меҳмон бўлган.
Бир хонада яшаш нархи кунига 180 АҚШ долларидан бошланади.
“Оқ нилуфар” сериалидаги Four Seasons Hotel San Dpmenico Palace меҳмонхонаси
“Оқ нилуфар” сериали қиммат курортга келган бойларнинг фитналари ва муаммоларига тўла. Сюжетга кўра, бир ҳафталик таътилга бир нечта ғалати миллионерлар Гавайининг элита меҳмонхонасига келишади. Дам олиш ва кундалик ташвишларни унутмоқчи бўлган ушбу қаҳрамонларни ҳафсаласи пир бўлади: бир меъёрдаги дам олиш меҳмонлардан бирининг сирли ўлими билан кескин тус олади.
Four Seasons Hotel Италиядаги Сицилия оролининг Таормина шаҳридаги ҳашаматли 5 юлдузли меҳмонхонадир. У 14-асрда қурилган Доминикан монастири биносида жойлашган бўлиб, 2021 йилда тўлиқ таъмирдан сўнг Four Seasons тармоғи остида қайта очилган.
Меҳмонхона денгизи соҳилидаги қояда жойлашган бўлиб, Этна вулқони ва қадимий юнон театрига панорамали манзараларни тақдим этади.
Бир кишилик хонанинг кунлик нархи 1500 АҚШ долларидан бошланади.
“Қинидан чиққан пичоқлар-2” фильмидаги Вилла 20 комплекси
Ҳашаматли комплекс 18 кишигача бўлган катта оилалар ва гуруҳлар учун мўлжалланган. Меҳмонларга қулайлик яратиш учун тўққизта ётоқхона (учтаси улкан люкс вариантда), хусусий пляж, хусусий спорт зали ва курорт, олтита бассейн, бешта ошхона, шунингдек, қоронғу тушгандан кейин йиғилишлар учун махсус таверна мавжуд.
Меҳмонхонанинг бир кечалик нархи 38 минг АҚШ долларидан бошланади.
“Уддалаб бўлмас топшириқ-8” фильмидаги Funken Lodgе бутик меҳмонхонаси
Норвегиянинг Свалбард архипелагидаги Лонгйир шаҳрида жойлашган бутик меҳмонхона бўлиб, шаҳарнинг энг юқори қисмида, Ҳауген тепалигида жойлашган. Меҳмонхона шаҳар ва унинг яқин атрофидаги музликларининг ажойиб манзараларини тақдим этади.
Меҳмонхонада 88 та замонавий жиҳозланган хона ва люкс хоналар мавжуд бўлиб, ҳар бирида қаҳва машинаси ва халатлар тақдим этилади. Нонушта ҳар доим кунлик ижара нархига киритилган бўлиб, ресторанлар кун бўйи хизмат кўрсатади. Бу маскан дунёнинг энг шимолий қисмидаги аҳоли пунктидаги ягона меҳмонхона ҳисобланади.
3300 АҚШ доллари — бу пулга бир киши учун тўрт кунлик турар жой, шаҳаргача парвоз ва трансфер хизмати киритилган.
“Жаҳон уруши Z” фильмидаги Домус Замиттелло меҳмонхонаси
Малтанинг пойтахти Валлеттанинг марказида жойлашган ҳашаматли бутик меҳмонхона 1580 йилда қурилган бўлиб, 17-асрга тегишли сарой ҳудудида жойлашган. Ҳозирда у ўзининг тарихий аҳамиятини сақлаб қолган ҳолда замонавий қулайликларни тақдим этади.
Бир кишилик хонанинг бир кунлик нархи 250 АҚШ долларидан бошланади.
Изоҳ (0)