Франциянинг Baluchon компанияси томонидан ишлаб чиқилган Cardabelle номли ихчам ва функсионал уй ташқи кўринишидан кичик бўлса-да, унинг ички қисмни ҳайратга солиши шубҳасиз. Узунлиги 6 метр бўлган ушбу ҳаракатланувчи мобил уйда икки киши яшаши учун барча шароитлар мужассам.
Cardabelle лойиҳаси икки ўқли, двигателсиз тиркама устида қурилган. Унинг деворлари қизил қарағай дарахти ва алюминий билан қопланган. Уйнинг каркаси арча дарахтидан, иссиқликни ушлаб турувчи қоплама эса қайта ишланган пахта, зиғир ва канопдан тайёрланган. Мобил хонадоннинг ихчам ҳажми узоқ масофага саёҳат қилишни яхши кўрадиганлар учун қулайлик яратади.
Олд эшик уйнинг меҳмонхонасига олиб киради. Унда деразалар сони кўплиги туфайли хоналар торлиги сезилмайди. Чап томонда диван-кроват қўйилган, унинг ички қисмида турли предметларни сақлаш жойи мавжуд. Диван тепасида бир нечта жавонлар қўйилган.
Уйнинг пастки қаватдаги аксарият қисми ошхонадан иборат. Франциянинг митти уйлар стандартларига кўра, мазкур хонадон дид ва маҳорат билан жиҳозланган. Ошхонада печ, музлатгич, иккита конфоркали газ плитаси, раковина ва бир нечта жавонлар мавжуд. Бундан ташқари, иш столи ва икки кишилик бар столлари ҳам жойлашган. Унинг остида ноутбукдан фойдаланиш учун алоҳида столча яширинган.
Cardabelle уйидаги ҳаммом меҳмонхонанинг қарама-қарши томонида ўрнатилган. У ерга ошхона орқали кириб бориш мумкин. Ҳаммом душ, раковина ва ҳожатхона билан жиҳозланган. Мазкур уйда икки кишилик ётоқхона мавжуд ва унга қутилар шаклидаги зинапоя орқали чиқилади.
Baluchon компаниясига тегишли бундай уйларнинг нархи одатда 90 минг АҚШ долларидан бошланади. Cardabelle уйининг нархи ҳозирча номаълум.
Изоҳ (0)