Гонконгда Zaha Hadid Architects бюроси томонидан лойиҳалаштирилган дунёдаги энг қимматбаҳо осмонўпар бино — The Henderson минораси қурилиши якунига етмоқда. Бизнес марказлар, турли офислар ҳамда кўнгилочар масканлардан иборат мазкур бино жойлашган ҳудуд 2017 йилда харид қилинган ва ҳар бир квадрат метри 950 минг долларга баҳоланган. Шу тариқа The Henderson биноси дунёдаги энг қиммат бинога айланган.
36 қаватли бино Гонконгнинг бизнес шаҳарчасида жойлашган бўлиб, қурилиш ишлари ҳали ҳам давом этаётган бўлса-да, аллақачон мегаполиснинг энг замонавий меъморий ёдгорлигига айланган. У дунёга машҳур бошқа бинолар — Хитой Банкининг осмонўпар биноси ва HSBC биноси олдида қурилмоқда.
“Биз ушбу лойиҳага қўл урар эканмиз, XXI асрга хос ноёб ва бошқа архитектура намуналарига ўхшамайдиган замонавий бино барпо этиш кераклигини билар эдик ва мазкур лойиҳа бутун дунё бўйлаб шов-шувга сабаб бўлишини истар эдик”, деди Zaha Hadid Architects раҳбари Патрик Шумахер.
Лойиҳа 2023 йилда якунланиши керак эди, аммо қурилиш ва дизайн ишлари муддати узайтирилди. Яқин кунларда олинган фотосуратлардан кўриш мумкинки, бино аллақачон якунланиш арафасида. Унинг аксарият шиша панеллари тўлиқ ўрнатилган. Бундай панеллар жами 4 мингга яқин бўлади.
Минора корпуси Гонконгнинг иккита метро бекатига ва Chater Garden боғига олиб борадиган пиёдалар йўлига уланади, уларнинг яқин жойлашуви бинонинг ташқи кўринишида акс этган: The Henderson минораси ёнидаги осмонўпар бинолардан ўзининг геометрик фигураси билан фарқ қилади. Бинонинг илк қаватлари орхидея гулларини ёдга солувчи ўзига хос шаклга эга.
Изоҳ (0)