Тошкент шаҳрининг 2045 йилгача бўлган даврга мўлжалланган бош режасини тасдиқлаш тўғрисида Вазирлар Маҳкамаси қарори эълон қилинди.
Қарорда келтирилишича, Тошкент шаҳрини комплекс ривожлантириш ва қурилишни режалаштириш ҳамда қурилишни режалаштириш сифати ва даражасини ошириш, шаҳарнинг меъморий-режалаштирилган қиёфасини ҳамда инфратузилмасини янада яхшилаш мақсад қилинган.
Бош режанинг асосий кўрсаткичларини белгиловчи хариталар Қурилиш ва уй-жой коммунал хўжалиги вазирлигининг Шаҳарсозлик кадастри геоахборот тизимида очиқ маълумот сифатида жойлаштирилади.
Ҳар қандай қурилиш ишларини амалга ошириш тасдиқланган бош режа асосида белгиланган тартибда ушбу ҳудуднинг мастер режаси, батафсил режалаштириш лойиҳаси ёки қурилиш лойиҳаси ишлаб чиқилиб, тасдиқлаган ҳолда амалга оширилади.
Бош режанинг ижроси бўйича амалга оширилаётган ишлар натижадорлиги бўйича Тошкент шаҳар ҳокимининг ҳисоботи ҳар чорак якуни бўйича Вазирлар Маҳкамаси раёсати мажлисида эшитиб борилади.
Бош режани ишлаб чиқишдан асосий мақсад:
- қурилишга рухсат бериш жараёнларини тартибга солиш;
- шаҳарнинг муҳандислик ҳамда йўл-транспорт инфратузилмасини, аҳоли зичлиги параметрларини, шунингдек, умумий стратегиясини режелаштириш;
- шаҳарнинг яшил ва санитар ҳимояланадиган ҳудудлари ҳамда маданий меросини муҳофаза қилиш;
- иқтисодий-ижтимоий ривожланиш йўлларини белгилаш;
- аҳолининг бугунги ва истиқболдаги талабларини қаноатлантириш.
Бош режада қуйидаги муаммоларни ҳал қилишга алоҳида эътибор қаратилган:
- Тошкент шаҳрининг ҳудудларини зоналарга ажратиш
- аҳолининг ҳаракатланишига бўлган талабни қондириш ҳамда транспорт оқими барқарорлигини таъминлаш
- шаҳарнинг ҳудудлари зичлик параметрларининг барқарорлигини таъминлаш мақсадида шаҳарсозлик талабларини белгилаш.
Президентнинг 2023 йил 11 сентябрдаги қарорига мувофиқ шаҳарларнинг бош режаларини соддалаштирилган кўринишда ишлаб чиқишга рухсат этилган.
Соддалаштирилган кўринишдаги бош режа Тошкент шаҳрининг ҳудудларини қуйидаги зоналарга ажратиб беради:
- консервация зоналари
- реконструкция зоналари
- реновация зоналари.
Консервация зонасида маданий мерос бинолари, тарихий жойлар, уйлар ва яшил ҳудудлар ўзгаришсиз қолади. Бу зонада қўшимча турар ва нотурар бино ҳамда иншоотлар қуриш тақиқланади. Реконструкция зонасида мастер-режалар асосида қўшимча қурилишлар қилиш мумкин бўлади. Реновация зонасида эскирган уй-жой, бинолар ўрнида янги қурилишлар ва таъмирлаш амалга оширилади.
Ҳужжатда белгиланишича, пойтахт ҳокимлиги 3 ой муддатда Тошкент шаҳрининг 2045 йилгача бўлган даврга мўжжалланган бош режасини амалга ошириш бўйича комплекс чора-тадбирлар режасини ишлаб чиқиб, тегишли вазирлик ва идоралар билан келишган ҳолда тасдиқлаш учун Вазирлар Маҳкамасига киритиши лозим.
Қурилиш уй-жой коммунал хўжалиги вазирлиги бош режага риоя этилиши юзасидан давлат архитектура назоратини амалга оширади.
Тошкент бош режаси ҳақида
Шавкат Мирзиёев 2024 йил 9 октябрь куни Тошкент шаҳрининг бош режаси лойиҳаси билан танишганди. Давлат раҳбари пойтахтни камида 7,5 миллион одам яшаши ва ишлаши учун қулай шароитга эга йирик мегаполисга айлантириш зарурлигини таъкидлаганди.
Бугунги кунда шаҳар ҳудуди 43 минг 822 гектарни ташкил қилади, аҳоли сони 3 миллиондан зиёд. Келгусида бу миқёс янада ошиб бориши тайин. Шу боис Тошкент шаҳрининг 2045 йилгача бўлган даврга мўлжалланган бош режаси лойиҳалаштирилди. Давлат раҳбари бу борадаги илк ишланмалар билан 2022 йилда танишган эди. Унда берилган кўрсатма ва тавсиялар асосида лойиҳа такомиллаштирилди.
Бош режани тайёрлаш муддати бир неча бор қолдирилган эди
2012 йил ёзида Тошкент шаҳри ва унинг атрофи бош режасининг 2030 йилгача ҳисобланган техник-иқтисодий асослари муҳокама қилингани ҳақида хабар берилган. 2018 йилнинг августидаги президент фармонида пойтахтнинг тасдиқланган бош режаси мавжуд эмаслиги “тартибсиз қурилишларга олиб келмоқда, тадбиркорлик субъектлари фаолиятини янада кенгайтиришга имкон бермаяпти, шунингдек, пойтахтни фаол ижтимоий-иқтисодий ривожлантиришга тўсқинлик қилмоқда”, дея қайд этилганди.
Шаҳар ҳокимига 2018 йил 1-октябрга қадар бош режа концепциясининг лойиҳаси ҳамда бош режанинг ўзини ишлаб чиқиш бўйича халқаро танлов ўтказиш топширилган.
2019 йилнинг февраль ойида пойтахт ҳокимининг архитектура, капитал қурилиш ва коммуникацияларни ривожлантириш масалалари бўйича собиқ биринчи ўринбосари Даврон Ҳидоятов (ҳозирги Чирчиқ шаҳар ҳокими) Тошкент шаҳрининг бош режаси концепцияси ўша йилнинг апрелига қадар 3D форматда тайёрланиши ҳақида маълум қилганди. Шунингдек, у лойиҳани яратиш устида Хитой, Туркия ва Буюк Британия компаниялари иш олиб бораётганини қайд этган эди.
Кейинчалик белгиланган муддатлар ортга сурилди — ишлаб чиқишда турк компанияси иштирок этган ҳужжат 2020 йилда тақдим этилиши режалаштирилаётгани маълум қилинди.
Ўша вақтда Қурилиш вазирининг собиқ биринчи ўринбосари бўлган Шерзод Хидоятов 2020 йил декабрь ойида Тошкентнинг бош режасини ишлаб чиқиш 2022 йил охиригача якунланиб, аҳолига тақдим этилиши режалаштирилганини маълум қилди. Ушбу муддат ҳукумат томонидан тасдиқланган муддатга мос келади.
Президентнинг 2020 йил ноябрдаги қарори билан 2025 йилгача Ўзбекистоннинг барча шаҳарлари ва шаҳар посёлкаларининг тўртдан бир қисмини бош режалар билан қамраб олиш белгиланган. Бунда лойиҳа ҳужжатлари жамоатчилик муҳокамаси натижаларини ҳисобга олган ҳолда тасдиқланиши лозим эди.
Шавкат Мирзиёев 2022 йил 18-октябрь куни “ТошкентбошпланЛITI” давлат унитар корхонасига бориб, Тошкент шаҳрининг 2045 йилгача бўлган Бош режаси лойиҳаси билан танишганди. Ўшанда Тошкент шаҳрининг 2045 йилгача бўлган бош режаси лойиҳаси “Янги Тошкент” концепцияси билан мутаносиб тайёрлангани айтилган. Бу янги шаҳар пойтахтнинг шарқий қисмида, Чирчиқ ва Қорасув дарёлари оралиғида барпо этилади. 500 минг аҳолига мўлжалланган бўлади.
2023 йил 16 январь куни президент Тошкент шаҳар ҳокими Жаҳонгир Ортиқхўжаевни ишдан олганди. Йиғилишда давлат раҳбари пойтахтнинг бош режаси ҳалигача тасдиқланмагани натижасида рухсатсиз қурилган объектлар сони 250 дан ошиб кетгани, қурилишга рухсат берилганда, мавжуд инфратузилмага юклама бўйича аниқ ҳисоб-китоб қилинмаётгани, бозорларда озиқ-овқат музлаб қолмаслиги учун, нарх-наво ошиб кетмаслиги учун чора кўрилмаётгани учун пойтахт мутасаддиларига қатъий эътироз билдирилганди.
Изоҳ (0)