Туркия кино саноатининг ҳақиқий юлдузига айланган, бир нечта хорижий тилларга таржима қилинган “Муҳташам юз йил” сериали бутун дунё томошабинлари қалбидан чуқур жой олган. Сериалда кўрсатилган бир нечта воқеалар тарихга зид бўлса-да, ундаги умумий маъно сақланиб қолган. Шу сабабли бутун дунё бўйлаб сериал мухлислари тарихий драма воқеалари содир бўлган жойларни кўришга қизиқади. Бугунги мақолада биз Усмонлилар империяси ташкил қилинган диққатга сазовор жойларга виртуал саёҳат қиламиз.
Усмонлилар империясининг юраги — Топкапи саройи
“Муҳташам юз йил” сериалидаги энг таниқли жой бу ҳашаматли Топкапи саройи бўлиб, воқеаларнинг аксарияти Усмонли султонларининг қароргоҳи бўлган ушбу бинода содир бўлган. Сарой бугунги кунда музей сифатида фаолият кўрсатмоқда. Қадрли маданий хазинага эга бинонинг тарихи 1460 йилга бориб тақалади.
Бир пайтлар 4000 га яқин аҳолини қабул қилган саройга ҳар йили юз минглаб одамлар ташриф буюришади. Туркия Республикаси ташкил этилгандан кейин Мустафо Камол Отатуркнинг илтимосига биноан 1924 йил йилда сарой музейга айлантирилган.
Сериалда кўрсатилган кўплаб саҳналар саройнинг ўзида эмас, балки махсус қурилган павильонларда суратга олинган бўлса-да, ҳақиқий Топкапи биноси ўша давр руҳини ўзининг маҳобатли бинолари, яшил боғлари билан эслатиб туради.
Босфор соҳилидаги абадий бино — Аё София масжиди
Истанбулдаги энг қадимий бинолардан бири Аё София Византия даврида император Константин II томонидан бунёд этилган бўлиб, эпископликнинг маркази бўлган ва Византия империяси учун муҳим аҳамиятга эга бўлган. Аё София кўплаб неча зилзилалар ва ёнғинлардан омон қолган ва кўп бор қайтадан тикланган. Истанбул Усмонлилар қўлига ўтгандан кейин бино масжидга айлантирилган.
Биринчи жума намозини 1453 йил 1 июнда Истанбулда ўқиган Фотиҳ Султон Маҳмуд Аё София Усмонлилар ҳукмронлиги остидаги масжид эканини эълон қилган. Сўнг у ерда меҳроб ва минбар қурилган, қўнғироқ ва хочлар эса олиб ташланган.
“Муҳташам юз йил” сериали Аё София янада машҳур бўлишига ҳисса қўшди. Гарчи сериалда масжиднинг ташқи кўриниши компьютер графикаси ёрдамида бир оз ўзгартирилган бўса ҳам, бинога ташриф буюрувчи сериал мухлислари улкан фарқларни сезишмайди. Аё Софиядаги ўзига хос баланд гумбазлар ва улкан миноралар ҳатто тарихга қизиқмайдиганларни ҳам ҳайратда қолдиради.
Иброҳим пошо саройи: Султон Аҳмад майдони яқинидаги вазир қароргоҳи
Иброҳим пошо саройи Усмонлилар империясида қурилган энг буюк шахсий қароргоҳ бўлган ва ҳозирги кунгача сақланиб қолган. Бугунги кунда у ерда турк ва Ислом санъати музейи жойлашган бўлиб, унинг деворлари тарихнинг кўп саҳифаларини эслайди.
Сериалда вазир ўз қароргоҳига бориш учун узоқ вақт отда миниб юради, аслида Топкапи саройи билан Иброҳим пошонинг қароргоҳи бир неча дақиқа пиёда юришлик масофада жойлашган. Қадимий бино ўзининг ҳашаматли безаклари билан ҳайратга солади ва сизни Усмонлилар даврига қайтаради.
Султон ва унинг маҳбуби абадий уйқуга кетган маскан — Сулаймон ва Хуррам мақбаралари
Султон Сулаймон ва унинг рафиқаси ҳақидаги улуғ севги ҳикояси Истанбулнинг энг сокин ва гўзал гўшаларидан бирида тугаган. Эр-хотиннинг мақбаралари Сулаймония ҳовлисида жойлашган бўлиб, сайёҳлар учун очиқдир.
Сулаймоннинг дафн маросими билан боғлиқ саҳналар Эюп районида суратга олинган.
Изоҳ (0)