Ижтимоий тармоқларда Андижон шаҳрида жойлашган Заҳириддин Муҳаммад Бобур ҳайкалини кўчириб, ўрнига турар жой қуриш режалаштирилганлиги ҳақидаги хабар кенг муҳокамаларга сабаб бўлди.
Андижон вилоят ҳокимлиги ушбу хабар юзасидан муносабат билдириб, майдоннинг Бобур шоҳкўчасини боғловчи кўприк остида қолиб кетиши билан боғлади. Шунингдек, илмий кенгаш вакиллари, бобуршунослар ҳамда Андижон оқсоқоллари бошчилигида ушбу мавзу муҳокама этилиб, керакли хулоса олинганини маълум қилди.
“Дарё” мухбири билан суҳбатда бўлган ҳокимлик матбуот котиби Муслимбек Иброҳимов Ўзбекистон Республикаси Маданий мерос агентлигининг илмий-экспертлар кенгашидан хулоса олинганлигини билдирган. Маданий мерос агентлиги мазкур ҳолат юзасидан муносабат билдирди.
Таъкидланишича, ҳолат юзасидан Андижон вилояти Маданий мерос бошқармаси мутахассислари томонидан ўрганиш ишлари олиб борилган.
Заҳириддин Муҳаммад Бобур монументал санъат ёдгорлиги Ўзбекистон Республикаси Вазирлар Маҳкамасининг 2019 йил 4 октябрдаги 846-сонли қарори билан Моддий маданий меросининг кўчмас мулк объектлари Миллий рўйхатига киритилган.
“Давлат кадастрлари палатаси Андижон вилояти бошқармаси томонидан 2024 йилнинг 8 ноябрида Андижон вилояти Маданий мерос бошқармасига Андижон шаҳар Бобур ҳамда Амир Темур шоҳкўчалари кесишмасидаги Заҳириддин Муҳаммад Бобур монументал санъат ёдгорлигини Андижон шаҳар А.Фитрат кўчасида жойлашган “Жоме меъморий мажмуаси” архитектура ёдгорлиги ҳудудига кўчирилиши юзасидан мурожаат келиб тушган.
Маълумки, “Ўзбекистон Республикаси Маданий мерос объектларини муҳофаза қилиш ва улардан фойдаланиш тўғрисида”ги қонунининг 20-моддаси 5-бандида “Моддий маданий мерос объектини ҳозирги замонда фойдаланишга мослаштириш – моддий маданий мерос объектининг тарихий-бадиий қийматини асралишини ўзгартирмасдан унинг тарихий-маданий қимматга эга бўлган унсурларини таъмирлаш асосида ундан ҳозирги замонда фойдаланишга шарт-шароит яратиш мақсадида амалга ошириладиган илмий ва илмий-техник тадқиқотлар, лойиҳалаш ҳамда ишлаб чиқариш ишларини амалга ошириш” белгилаб қўйилган.
Шу билан бирга, Ўзбекистон Республикаси Вазирлар Маҳкамасининг 2019 йил 30 мартдаги 265-сон қарори 6-иловаси 9.5-бандида “Моддий маданий мероснинг кўчмас мулк объектлари ва уларнинг қўриқланадиган теграларида ер қазиш, ер тузиш, қурилиш, мелиорация ва бошқа хўжалик ишлари, асрашга доир ишларни амалга ошириш ҳамда илмий ва илмий-техник тадқиқотлар ўтказишга оид лойиҳаларга Маданий мерос агентлиги ҳузуридаги Илмий-эксперт кенгаши томонидан хулоса бериш белгиланган.
Юқоридагилардан келиб чиқиб, Бошқарма томонидан Заҳириддин Муҳаммад Бобур монументал санъат ёдгорлигини кўчириш масаласи юзасидан тегишли ташкилотларга Маданий мерос агентлиги ҳузуридаги Илмий-эксперт кенгашидан хулоса олиш учун тушунчалар берилган”, дейилади муносабатда.
Муносабатда кўриш мумкинки, Илмий-эксперт кенгаши томонидан Бобур ҳайкалини кўчириш юзасидан ҳали хулоса берилмаган.
Агентлик матбуот котиби Моҳинур Имомова мурожаат юзасидан ҳужжатлар энди тайёрланаётганини, натижалар тез орада ма`лум қилинишини билдирган.
Изоҳ (0)