Уйда унутиб қолдирилган болакай ҳақидаги режиссёр Крис Коламбусга тегишли машҳур комедияни кўрмаган одамни учратиш қийин. Фильмдаги нафақат ҳазил-мутойиба ва ранг-баранг воқеалар машҳур, балки фильм суратга олинган жойлар ҳам диққатга сазовор ҳудудларга айланган.
Фильм 1990 йилда экранларга чиққанига қарамай, “Уйда ёлғиз” суратга олинган жойлар ҳозирги кунга қадар минглаб сайёҳларни ўзига жалб қилиб келмоқда. Бугун мазкур афсонавий комедия суратга олинган 3 та энг қизиқарли манзиллар ҳақида маълумот берамиз.
Маккалистерлар оиласига тегишли уй: 671 Линкольн Авеню, Уиннетка, Иллинойс
Кевин (Маколей Калкин)ни кўча ўғриларидан моҳирлик билан ҳимоя қилган Маккалистерлар уйи Чикагода жойлашган бўлиб, 1920 йилларда қурилган. 400 квадрат метрлик бино диққатга сазовор жойлардан бири ҳисобланади. Хонадон 1990 йилдаги фильм муваффақиятидан кейин биринчи марта сотувга қўйилган. 2012 йилда уй 1,58 миллион долларга сотилган.
Ҳозирда мазкур уйда хонадонни беш ярим миллион долларга харид қилган оила истиқомат қилади. Кевиннинг уйи Иллинойс штатидаги энг кўп ташриф буюриладиган сайёҳлик жойларидан бири ҳисобланади.
Аэропорт саҳналари: O’Ҳара халқаро аэропорти, Чикаго
Маккаллистерлар оиласи Парижга жўнаб кетишдан аввал аэропортга шошилаётган саҳнани ҳақиқий аэропортда суратга олишган. Чикагодаги O’Ҳара аэропорти рейсга ҳовлиқаётган қариндошлар Кевиннинг ёлғиз қолганини сезиб қоладиган саҳналар тасвирга олинган жой ҳисобланади.
Рождество совғалари дўкони: Плаза меҳмонхонаси, Нью Йорк
Фильмдаги асосий воқеалар Уиннетка қишлоғида содир бўлади, аммо айрим саҳналар Нью Йоркда суратга олинган. Масалан, энг машҳур ва қимматбаҳо бўлган Плаза меҳмонхонаси шулар жумласидандир. Манҳеттен марказидаги ҳашаматли меҳмонхона АҚШдаги энг нуфузли жойлардан бири бўлиб, фильмнинг иккинчи қисмида намойиш этилган.
Плаза бугунги кунда Нью Йоркнинг архитектура ёдгорлиги ҳисобланади. 1978 йилда бинога миллий ва тарихий ёдгорлик мақоми берилган. У 1907 йилда очилган бўлиб, бу ерда АҚШ президентлари, қироллик оилалари аъзолари ва таниқли шахслар яшаган ва ҳозир ҳам шу ерда қолишади. Ҳар бир хона биллур қандиллар, мармар поллар, кўплаб олтиндан ясалган декорациялар билан тўлдирилган. Деразадан марказий боғни томоша қилиш мумкин.
Изоҳ (0)