Ўзбекистонда ўсимлик ёғи, гўшт ва картошка маҳсулотлари импорти ҳамда реализацияси учун қўшимча қиймат солиғидан (ҚҚС) берилган имтиёзлар муддати узайтирилиши мумкин. Бу ҳақда Олий Мажлис Қонунчилик палатаси депутати Дониёр Ғаниев маълум қилди.
Солиқ кодексига ўзгартиришлар киритишни назарда тутувчи қонун лойиҳасига кўра, Ўзбекистон ҳудудига ўсимлик ёғи, кунгабоқар ва зиғир уруғи, шунингдек, соя данагини олиб кириш ҳамда ўсимлик ёғини ишлаб чиқариш ва (ёки) реализация қилиш бўйича айланмаларни ҚҚСдан озод қилишга оид амалдаги имтиёзлар муддати 2022 йил 31 декабргача узайтирилади.
Бундан ташқари, қонун лойиҳаси билан 2022 йил 31 декабрга қадар гўшт (мол, қўй), тирик ҳайвонлар (мол, қўй) ва уларни сўйишдан олинган маҳсулотлар, шунингдек, картошкани Ўзбекистон ҳудудига олиб кириш ҳамда уларни реализация қилиш бўйича айланмаларни ҚҚСдан озод қилиш таклиф этилмоқда.
Жаҳон банки экспертлари фикрича, Украинадаги вазият туфайли бутун дунёда озиқ-овқат маҳсулотларининг нархлари охирги 50 йилда кузатилмаган рекорд даражада ошиши кутилмоқда. Айниқса, ўсимлик ёғига бўлган глобал талабнинг 60 фоизи Украина ва Россия экспорти ҳисобига қондирилиши ҳисобга олинса, дунё бозорларида ўсимлик ёғи нархлари йил давомида камида 30 фоизга ўсиши прогноз қилинмоқда.
«Табиийки, бундай ҳолатда ўсимлик ёғи, шунингдек, гўшт ва картошка маҳсулотлари импортига нисбатан ҚҚС имтиёзлари берилиши аҳолимизни асосий турдаги озиқ-овқат маҳсулотларига бўлган талабини тўлақонли қондириш ҳамда ушбу маҳсулотлар нархларини бозорларда барқарор сақлашга хизмат қилади», — деб ёзади депутат.
Шунингдек, депутатга кўра, банан, ананас ва бошқа цитруслар учун бождан озод қилиш бўйича 2022 йилнинг 1 майига қадар берилган имтиёзлар муддати ҳам йил охиригача узайтирилиши мумкин. «Тан олиш жоизки, бу ҳаракатлар барчаси аҳоли фаровонлигини таъминлаш, уларнинг харид қобилиятини оширишга хизмат қилади. Шу билан бирга, инфляция даражасини 10-12 фоиз атрофида ушлаб туриш имконини беради», — дейди Ғаниев.
Эслатиб ўтамиз, 2021 йилда парламент томонидан 2021 йил 1 майдан 31 декабргача бўлган муддатда кунгабоқар ва соя уруғлари ҳамда ўсимлик ёғи импорти, шунингдек ўсимлик ёғини ишлаб чиқариш ва ички бозорда реализация қилиш ҚҚСдан озод этилганди. Кейинроқ мазкур имтиёз яна тўрт ойга узайтирилганди. Декабрь ойида эса Ўзбекистонда асосий озиқ-овқат маҳсулотлари импорти ва реализацияси учун қўшимча қиймат солиғидан (ҚҚС) берилган имтиёзлар муддати узайтирилган.
Изоҳ (0)