Бразилиядан хом шакар, Покистондан картошка, Туркиядан маргарин — қандай қилиб ҳозир Ўзбекистон озиқ-овқат хавфсизлигини таъминлаяпти?

Январь—апрель ойларида Ўзбекистон 102 давлатдан озиқ-овқат импорт қилган. Бу Давлат статистика қўмитаси ҳисоботида қайд этилган.

Озиқ-овқат импорти 1,1 миллиард долларни ташкил этди. Таққослаш учун, ўтган йилнинг шу даврида 756,3 миллион доллар бўлган эди.

Импортнинг асосий қисми буғдойга тўғри келган – 281,3 миллион доллар. Иккинчи ўринда шакарқамиш хом ашёси (119,6 миллион доллар), учинчи ўринда маргарин ва аралаш ёғ (113,3 миллион доллар).

Буғдой импорти 45,4 фоизга, шакар хом ашёси – 46 фоизга, маргарин ва ёғ-мой импорти 6,2 баробарга ошган.

Бундан ташқари, Ўзбекистонга катта ҳажмдаги гўшт (ўсиш 2,2 баробарга), картошка (2 баробарга ўсиш) ва какао (26,7 фоизга ўсиш) импорт қилинган.

Озиқ-овқат импорти географияси йил сайин кенгайиб бормоқда. 2022 йилда Ўзбекистон Бразилиядан хом шакар, Покистондан картошка, Туркиядан маргарин, Эквадордан банан сотиб олмоқда.

Аввалроқ Ўзбекистонда озиқ-овқат импорти ортиб бориши сабаби маълум бўлган эди.

Биринчи омил – Россия ва Беларусь давлатларига нисбатан АҚШ, Европа ва бошқа ривожланган давлатлар томонидан қўлланилган иқтисодий санкциялар жаҳон озиқ-овқат бозорида нархларнинг ва логистика тарифларининг ўсишига сабаб бўлганидир.

Иккинчи омил – Ўзбекистон томонидан бир қатор қўшни давлатларга буғдой, ун ва ўсимлик ёғи маҳсулотларини экспорт ва реекспорт қилиш ҳажмининг ўсиши ҳисобланади.

Озиқ-овқат маҳсулотлари импортининг умумий ҳажмининг ўсишига ўртача импорт нархларининг қимматлашуви қарийб 55-60 фоиз даражасида таъсир кўрсатган бўлса, импорт қилинган маҳсулотлар ва улардан тайёрланган маҳсулотлар экспорти ҳажмининг ўсиши 40-45 фоиз таъсир кўрсатган.