Гуруч арзонлашди, саримсоқ пиёз қимматлашди: Ўзбекистон бозорларида ноябрь ойида нархлар қандай ўзгармоқда?

Ўзбекистонда 1—13 ноябрь кунлари бозорларда қишлоқ хўжалиги ва гўшт маҳсулотларининг улгуржи нархлари ҳақида маълумот берилди.

Ушбу давр мобайнида бозорда киви 6 минг сўмга, узум 1,5 минг сўмга, гуруч (лазер) минг сўмга арзонлаган.

Шунингдек, саримсоқ пиёз 4 250 сўмга, банан ва мандарин 2,5 минг сўмга, нўхат 2 минг сўмга, помидор 1,5 минг сўмга, бодринг 750 сўмга, бақлажон 600 сўмга, сабзи (қизил) 500 сўмга, картошка, карам, сабзи (сариқ) 250 сўмга ошган.

Жорий йилнинг 1—13 ноябрь кунлари, умумий қиймати 124,9 млн долларлик (ўтган йилнинг мос даврига нисбатан 70,2 млн доллар кўп) жами 177,2 минг тонна (103,2 минг тонна кўп) қишлоқ хўжалиги маҳсулотлари экспорти амалга оширилди.

Мазкур даврда қуйидаги маҳсулотлар ташқи бозорларга етказиб берилган:

• 46,3 минг тонна узум;
• 26 минг тонна хурмо;
• 21,7 минг тонна мош;
• 14 минг тонна ловия;
• 11,6 минг тонна пиёз;
• 6 минг тонна қуритилган мева;
• 4,7 минг тонна турп;
• 4,6 минг тоннадан майиз ва помидор;
• 3,5 минг тонна кўк пиёз;
• 3,2 минг тоннадан кўкат ва ерёнғоқ.

Шунингдек, ушбу давр мобайнида 16,6 млн доллар (ўтган йилнинг мос даврига нисбатан 9,4 минг доллар кўп) қийматидаги жами 77,7 минг тонна (36,7 минг тонна кўп) қишлоқ хўжалиги маҳсулотлари, хусусан, 57,3 минг тонна картошка, 13,9 минг тонна банан, 847 тонна мандарин, 508,2 тонна киви ҳамда 571,2 тонна апельсин импорт қилинган.

«Қўйлиқ» бозорига ҳудудлардан жами 10 минг тонна, хусусан, 5,2 минг тонна картошка, 3,5 минг тонна пиёз, 295 тонна карам ва 986 тонна сабзи келтирилган.

Хусусан, ҳудудлар ва маҳсулотлар кесимида таҳлил қилинганда:

• Самарқанддан 871 тонна, Тошкент вилоятидан 532 тонна картошка;
• Жиззахдан 1 280 тонна, Самарқанддан 1 224 тонна ва Тошкент вилоятидан 1 042 тонна пиёз;
• Тошкент вилоятидан 295 тонна карам;
• Қашқадарёдан 482 тонна, Бухородан 212 тонна, Тошкентдан 177 тонна, Сурхондарёдан 87 тонна ва
• Фарғонадан 28 тонна сабзи етказиб берилган.

Шунингдек, «Қўйлиқ» бозорига Қозоғистондан 3 164 тонна, Қирғизистондан 552 тонна ва Покистондан 57 тонна картошка келтирилган.

Шу билан бирга, ҳудудлардан «Чорсу» деҳқон бозорига жами 187,2 тонна, шу жумладан, 170,5 тонна мол гўшти ва 16,7 тонна қўй гўшти келтириб сотилган.