Банан нархи кескин ошди, қовун ва гуруч арзонлашди: Ўзбекистон бозорларида октябрь ойидаги нархлар қандай бўлмоқда?

Ўзбекистонда 1—16 октябрь кунлари бозорларда қишлоқ хўжалиги ва гўшт маҳсулотларининг улгуржи нархлари ҳақида маълумот берилди.

Ушбу давр мобайнида бозорда қуйидаги маҳсулотлар арзонлаган:

• лимон 10 минг сўмга;
• қовун 2,5 минг сўмга;
• гуруч (лазер) 1,5 минг сўмга;
• гуруч (аланга) 750 сўмга;
• тарвуз 250 сўмга.

Айнан шу даврда банан 5 минг сўмга, картошка 500 сўмга ошган.

Жорий йилнинг 1—16 октябрь кунлари умумий қиймати 60,1 млн долларлик (ўтган йилнинг мос даврига нисбатан 10,4 млн доллар кўп) жами 79,7 минг тонна (8,8 минг тонна кўп) қишлоқ хўжалиги маҳсулотлари экспорти амалга оширилди.

Мазкур даврда қуйидаги маҳсулотлар ташқи бозорларга етказиб берилган:

• 26,2 минг тонна узум;
• 11,9 минг тонна хурмо;
• 7,6 минг тонна пиёз;
• 4,1 минг тонна ловия;
• 3,5 минг тонна майиз;
• 3,2 минг тонна мош;
• 2,5 минг тонна турп;
• 2,2 минг тонна қовун;
• 2 минг тоннадан қуритилган мева;
• 1,5 минг тонна анор.

Шунингдек, ушбу давр мобайнида 5,3 млн доллар (ўтган йилнинг мос даврига нисбатан 910 минг доллар кўп) қийматдаги жами 26,9 минг тонна (613 тонна кўп) қишлоқ хўжалиги маҳсулотлари, хусусан, 20,4 минг тонна картошка, 1,7 минг тонна банан, 235 тонна мандарин ҳамда 205 тонна апельсин импорт қилинган.

«Қўйлиқ» бозорига 1—16 октябрь кунлари ҳудудлардан жами 13,7 минг тонна, хусусан, 6,8 минг тонна картошка, 4,9 минг тонна пиёз, 435 тонна карам ва 1,5 минг тонна сабзи келтирилган.

Хусусан, ҳудудлар ва маҳсулотлар кесимида таҳлил қилинганда:

• Самарқанддан 1 055 тонна, Тошкент вилоятидан 539 тонна картошка;
• Тошкент вилоятидан 2 675 тонна, Жиззахдан 2 122 тонна ва Самарқанддан 178 тонна пиёз;
• Тошкент вилоятидан 345 тонна карам;
• Тошкент вилоятидан 1 066 тонна, Самарқанддан 390 тонна, Фарғонадан 49 тонна, Қашқадарёдан 14 тонна сабзи етказиб берилган.

Шунингдек, «Қўйлиқ» бозорига Қозоғистондан 5 023 тонна ҳамда Қирғизистондан 163 тонна картошка келтирилган.

Шу билан бирга, ҳудудлардан «Чорсу» деҳқон бозорига 1—16 октябрь кунлари жами 191,4 тонна, шу жумладан, 171,8 тонна мол гўшти ва 19,6 тонна қўй гўшти келтириб сотилган.