Лимон ва киви қимматлади, олма ва мандарин арзонлади. Ўзбекистонда июль ойида бозорларда нарх қандай бўлмоқда?

Ўзбекистонда 1—12 июль кунлари бозорларда қишлоқ хўжалиги ва гўшт маҳсулотларининг улгуржи нархлари ҳақида маълумот берилди.

Ушбу давр мобайнида бозорда булғор қалампири (қизил), мандарин ва олма 2 500 сўмга, картошка (янги ҳосил, импорт) 250 сўмга арзонлаган.

Бундан ташқари нархлар бўйича:

• киви — 8,5 минг сўмга;
• лимон — 7,5 минг сўмга;
• бақлажон — 4,1 минг сўмга;
• саримсоқ пиёз — 3,5 минг сўмга;
• мош — 3 минг сўмга;
• турп — 2 750 сўмга;
• ловия ва гуруч (аланга) — 1,5 минг сўмга;
• гуруч (лазер) — 1 000 сўмга қимматлаган. 

Бодринг ва булғор қалампири нархлари (яшил) 500 сўмга ҳамда лавлаги 250 сўмга ошган.

Июль ойи бошида кунлари умумий қиймати 34,5 млн долларлик (ўтган йилнинг мос даврига нисбатан 4,6 млн доллар кўп) жами 53,7 минг тонна (7,6 минг тонна кам) қишлоқ хўжалиги маҳсулотлари экспорти амалга оширилди.

Бу даврда:

• 7,6 минг тонна олхўри;
• 5,9 минг тонна тарвуз;
• 5,6 минг тонна пиёз;
• 2,7 минг тонна узум;
• 2,3 минг тонна сабзи;
• 2,2 минг тонна олма;
• 1,3 минг тонна шафтоли;
• 1,1 минг тонна помидор ташқи бозорларга етказиб берилган. 

Бундан ташқари 4,1 минг тонна мош, 3,1 минг тонна қовун, 2,9 минг тонна ўрик, 2,3 минг тонна лавлаги ва 1,4 минг тонна кўкат экспорт қилинган.

Шунингдек, июль ойида 1,7 млн доллар (ўтган йилнинг мос даврига нисбатан 0,4 млн доллар кўп) қийматидаги жами 3,3 минг тонна (35,8 тонна кўп) қишлоқ хўжалиги маҳсулотлари, хусусан, 1,2 минг тонна банан, 0,9 минг тонна картошка, 99,1 тонна апельсин, 141,6 тонна олма, 24,2 тонна мандарин импорт қилинган.

«Қўйлиқ» бозорига 1–12 июль кунлари ҳудудлардан жами 11,3 минг тонна, хусусан, 3,9 минг тонна картошка, 4,8 минг тонна пиёз, 404 тонна карам ва 2,2 минг тонна сабзи келтирилган.

Ушбу бозорга Покистондан 55 тонна картошка олиб келинган.

Ҳудудлардан «Чорсу» деҳқон бозорига 1–12 июль кунлари жами 103,9 тонна, шу жумладан, 88,7 тонна мол гўшти ва 15,2 тонна қўй гўшти келтириб сотилган.