Мандарин ва помидор арзонлади, пиёз ва гуруч қимматлашди. Ўзбекистон бозорларида июль ойидаги нархлар қандай?

Ўзбекистонда 1—24 июль кунлари бозорларда қишлоқ хўжалиги ва гўшт маҳсулотларининг улгуржи нархлари ҳақида маълумот берилди.

Ушбу вақт давомида бозорда булғори қалампири, мандарин ва олма 2,5 минг сўмга, картошка ҳамда карам 250 сўмга, помидор 500 сўмга арзонлаган.

Шу билан бирга қуйидаги маҳсулотларнинг нархи ошган:

• киви 8,5 минг сўмга,
• лимон 7,5 минг сўмга,
• бақлажон 4,1 минг сўмга,
• пиёз 3 минг сўмга,
• турп 2,75 минг сўмга,
• ловия ва гуруч (аланга) 1,5 минг сўмга,
• пиёз 1,1 минг сўмга,
• гуруч (лазер) минг сўмга,
• бодринг ва булғор қалампири (яшил) 500 сўмга,
• лавлаги 250 сўмга қимматлаган.

Ушбу даврда умумий қиймати 74,4 млн долларлик (ўтган йилнинг мос даврига нисбатан 16 млн доллар кўп) жами 112,6 минг тонна (10,9 минг тонна кўп) қишлоқ хўжалиги маҳсулотлари экспорти амалга оширилди.

Хусусан, мазкур даврда

• 15,6 минг тонна олхўри,
• 12,9 минг тонна қовун,
• 10,9 минг тонна тарвуз,
• 8,5 минг тонна узум,
• 7,2 минг тонна пиёз,
• 4,3 минг тоннадан ловия ва сабзи,
• 3,4 минг тонна олма,
• 2,3 минг тонна анжир,
• 2,1 минг тонна шафтоли,
• 1,9 минг тонна қуритилган мева ташқи бозорларга етказиб берилган.

Шунингдек, ушбу давр мобайнида 4,5 млн доллар (ўтган йилнинг мос даврига нисбатан 1,5 млн доллар кўп) қийматдаги жами 7,5 минг тонна (1 минг тонна кўп) қишлоқ хўжалиги маҳсулотлари импорт қилинган.

Улар орасида 2,8 минг тонна банан, 2,5 минг тонна картошка, 264,9 тонна апельсин, 163,7 тонна олма, 85 тонна лимон мавжуд.

«Қўйлиқ» бозорига 1–24 июль кунлари ҳудудлардан жами 22,3 минг тонна, хусусан, 7,8 минг тонна картошка, 9,6 минг тонна пиёз, 848 тонна карам ва 4 минг тонна сабзи келтирилган.

Ҳудудлардан «Чорсу» деҳқон бозорига 1–24 июль кунлари жами 227,3 тонна, шу жумладан 192,1 тонна мол гўшти ва 35,2 тонна қўй гўшти келтириб сотилган.