Энг кўп узум ва қовун экспорти: сентябрь ойида Ўзбекистон бозорларида озиқ-овқат маҳсулотлари билан вазият қандай

Ўзбекистонда 1—4 сентябрь кунлари бозорларда қишлоқ хўжалиги ва гўшт маҳсулотларининг улгуржи нархлари ҳақида маълумот берилди.

Ушбу давр мобайнида бозорда асосий турдаги қишлоқ хўжалиги маҳсулотлари нархларида ўзгариш кузатилмади.

2022 йил 1–4 сентябрь кунлари умумий қиймати 11,7 млн долларлик (ўтган йилнинг мос даврига нисбатан 3,8 млн доллар кўп) жами 16 минг тонна (2,3 минг тонна кўп) қишлоқ хўжалиги маҳсулотлари экспорти амалга оширилди.

Мазкур даврда ташқи бозорларга:

• 7,6 минг тонна узум; 
• 1,8 минг тонна қовун; 
• 1,2 минг тонна пиёз; 
• 0,6 минг тоннадан нок ва ловия; 
• 0,5 минг тонна сабзи; 
• 0,4 минг тоннадан хурмо, олхўри, анор етказиб берилган.

Сентябрь бошида 103 минг доллар (ўтган йилнинг мос даврига нисбатан 36,5 минг доллар кўп) қийматдаги жами 141 тонна (88,6 тонна кўп) қишлоқ хўжалиги маҳсулотлари, хусусан 40,7 тонна лимон, 37,4 минг тонна банан, 6,8 тонна олма импорт қилинган.

«Қўйлиқ» бозорига 1–4 сентябрь кунлари ҳудудлардан жами 3,6 минг тонна, хусусан, 1,5 минг тонна картошка, 1,6 минг тонна пиёз, 84 тонна карам ва 389 тонна сабзи келтирилган. 

Бундан ташқари бозорга Қозоғистондан 443 тонна картошка ва 32 тонна пиёз келтирилган.

Ҳудудлардан «Чорсу» деҳқон бозорига 1–4 сентябрь кунлари жами 36,5 тонна, шу жумладан 29,9 тонна мол гўшти ва 6,6 тонна қўй гўшти келтириб сотилган.

Аввалроқ охирги беш йилда нархлар ўзгариши ўзбекистонликлар ҳаётига қандай таъсир қилгани ҳақида хабар берилган эди.