Қозоғистон ҳукумати пиёз экспортига қўйилган тақиқни бекор қилди, бироқ экспорт ҳажмига вақтинчалик чекловлар киритди. Мамлакат Қишлоқ хўжалиги вазирлиги бу ҳақда хабар берди.
Маълум қилинишича, 8 апрелдан 28 апрелгача республика ҳудудидан учинчи давлатлар ва Евросиё иқтисодий иттифоқи (ЁИИ) давлатларига 20 минг тонна пиёз экспорти учун квоталар жорий этилган.
“Битта талабгор учун товар экспортига рухсат этилган чеклов жами 500 тоннадан ошмайди”, — дейилади хабарда.
Мазкур чеклов квотанинг бутун муддати учун ўрнатилади. 2023 йил январь ойида Қозоғистон Қишлоқ хўжалиги вазирлиги пиёз экспортини 3 ой муддатга тўхтатганди. Бу пиёзнинг оммавий экспорт қилинишнинг олдини олиш ва нархларни барқарорлаштириш учун амалга оширилган.
Экин етишмаслиги Марказий Осиёнинг бир қанча мамлакатларида, жумладанб Тожикистонда қишлоқ хўжалиги маҳсулотлари етишмаслигига ҳам олиб келган. Оқибатда мамлакат пиёз, картошка ва сабзи экспортига чеклов киритган. Танқисликнинг асосий сабаблари аномал совуқ ва ёқилғи нархининг ошиши бўлган.
Маълумот ўрнида, Ўзбекистонда 15 мартдан пиёз экспортига қўйилган вақтинчалик чеклов бекор қилинган. Пиёз нархининг кескин ўсиши, аҳолининг ички истеъмол талабини қондириш ҳамда озиқ-овқат хавфсизлигини таъминлаш мақсадида ҳукумат топшириғи билан 1 январдан пиёз экспортига вақтинча чеклов ўрнатилганди. Ушбу чеклов 4 ой амал қилиши белгиланганди. Қирғизистон Марказий Осиёда пиёз экспортига қўйилган тақиқни муддатидан олдин (3 мартдан) бекор қилган биринчи давлат бўлган.
Изоҳ (0)