Россиянинг Ленинград вилоятида ўзбекистонлик муҳожир баландликдан тушиб кетиши оқибатида вафот этди. Бу ҳақда 78.ru хабар берди.
Маълум қилинишича, ҳодиса 25 январь куни Кингисепп тумани, Уст-Луга қишлоғида юз берган. Ўзбекистон фуқароси Краколе маҳалласидаги газни қайта ишлаш заводида металл конструкцияларни монтаж қилаётган бўлган. Оқибатда у 30 метр баландликдан тушиб кетган. Жабрланувчи касалхонасининг қабул бўлимига олиб кетилаётганда вафот этган. Ўзбекистон фуқароси 42 ёшда бўлган. Ҳозирда воқеа юзасидан текширув ишлари олиб борилмоқда.
Ўзбекистонликларнинг қурилишда ҳалок бўлишига оид сўнгги ҳолатлар:
Юқоридаги ҳодиса Россияда қурилиш ва таъмирлаш вақти ўзбекистонликлар билан содир бўлган биринчи ҳолат эмас. Жумладан, 13 январь куни Санкт-Петербург шаҳри Приморский туманида ўзбекистонлик қурувчи 16-қаватдан тушиб кетганди. 30 ёшли ўзбекистонлик арматурачи ҳодиса оқибатида ҳалок бўлган.
26 ноябрь куни яна Санкт-Петербург шаҳри Муром кўчасида қурилиш вақти Ўзбекистон фуқароси томдан тушиб кетган. Марҳум ўзбекистонлик 47 ёшли муҳожир бўлиб, қурилиш компаниясига монтажчи бўлиб ишга кирган.
22 ноябрь куни Ленинград вилоятида 20 ёшли ўзбекистонлик ишчи қурилиш майдончасида вентиляция тешигига тушиб кетиб ҳалок бўлган. 3 ноябрь куни Ленинград вилоятида 19 ёшли ўзбекистонлик қурувчи тўққизинчи қаватдан тушиб вафот этганди.
Изоҳ (0)