Россиянинг Пенза вилоятида ўзбекистонликлар ЙТҲга учрагани хабар қилинганди. Ҳалок бўлганларнинг икки нафари Ўзбекистон фуқароси экани тасдиқланди.
“КамАЗ” юк машинаси ва Cobalt автомобили тўқнашганди. Оқибатда 1996 йилда туғилган Cobalt ҳайдовчиси ҳамда 1980 ва 1965 йилда туғилган икки йўловчи эркак воқеа жойида ҳалок бўлган. Дастлабки маълумотда ҳалок бўлганларнинг бир нафари Ўзбекистон фуқароси экани қайд этилган.
Ўзбекистоннинг Қозон шаҳридаги Бош консулхонасининг маълум қилишича, олиб борилган тадбирлар натижасида ҳалок бўлганларнинг икки нафари (1980 ва 1996 йилда туғилган фуқаролар) Ўзбекистон фуқароси экани аниқланди.
Бош консулхона маҳаллий ҳокимият вакилларининг кўмагида турли жароҳатлар олган икки нафар Ўзбекистон фуқароси Кузнеск туманлараро шифохонасидан Пенза шаҳар 6-марказий клиник шифохонасига кўчирилган.
“Тиббиёт муассасасининг шифокорлари билан учрашув ўтказилиб, доимий алоқа ўрнатилиб, аҳволи бўйича мунтазам равишда маълумот олинмоқда”, дейилади хабарда.
Қўшимча қилинишича, айни пайтда Бош консулхона жасадларни ватанга қайтариш бўйича зарур расмийлаштирув ишларини якунлаш чораларини кўрмоқда.
Россияда автоҳалокатга учраган ўзбекистонликлар
2024 йил январида Россиянинг Пенза вилоятида йўл-транспорт ҳодисаси оқибатида саккиз нафар ўзбекистонлик ҳалок бўлганди. JAC русумли микроавтобус қарама-қарши йўлга чиқиб кетиши оқибатида Volvo юк машинаси билан тўқнашган. Қурбонларнинг жасади Мудофаа вазирлигининг махсус самолётида Урганч шаҳрига олиб келинган.
2024 йилнинг сентябрида Россиянинг Нижегород вилоятида содир бўлган ЙТҲда етти нафар ўзбекистонлик ҳалок бўлганди. Ўсгҳа ойда Тюмен-Ханти-Мансийск автомобиль йўлида Россияда ноқонуний бўлиб турган 55 ёшли Ўзбекистон фуқароси ЙТҲга учраб, вафот этганди. Татаристонда содир бўлган йўл-транспорт ҳодисаси натижасида ўзбекистонлик йигит оғир тан жароҳати олганди.
Изоҳ (0)