Россияда ота-она қарамоғисиз қолган 15 нафар бола 15 декабрь куни Ўзбекистонга қайтарилди. Бу ҳақда Ижтимоий ҳимоя миллий агентлиги хабар қилди.
Декабрь ойи бошларида агентлик ИИВ, ССВ ходимлари билан ҳамкорликда Россиянинг 6 та ҳудудида жойлашган 10 нафар болани ватанга қайтариш бўйича ишларни бошлаган эди. Ўрганишлар жараёнида яна 5 нафар бола ота-она қарамоғидан маҳрум бўлгани аниқланди.
Уларнинг барчаси Ўзбекистонга қайтарилди. Ўз оилаларига қайтарилишига қадар болаларнинг 10 нафари Вояга етмаганларга ижтимоий ҳуқуқий ёрдам кўрсатиш марказига, қолган 5 нафари эса вақтинчалик Тошкент шаҳридаги болалар уйига жойлаштирилди.
Болалар қайтарилгач, мутасадди ходимлар уларнинг оилавий муҳити ва боланинг ҳолатини мунтазам мониторинг қилади ва зарурият туғилганда ижтимоий хизматлар бириктиради.
Бундан аввал Россиянинг Свердловск вилоятида қийин аҳволда қолган бир оиланинг беш нафар аъзоси Ўзбекистонга қайтарилгани ҳақида хабар берилган эди.
Хориждан Ўзбекистонга қайтарилган фуқаролар
Август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди. Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди.
Изоҳ (0)