“Россотрудничество” расмийлардан Тошкентдаги мактабда ўқувчини калтаклаган ўқитувчининг Россияга киришини тақиқлаш имкониятини кўриб чиқишни сўрайди. Бу ҳақда агентлик раҳбари Евгений Примаков хабар берди.
“Россотрудничество” ваколатли органларга ушбу русофоб шахснинг Россияга киришини тақиқлаш имкониятини кўриб чиқишни сўраб мурожаат қилади... Ушбу шахс ҳам, унинг яқин қариндошлари ҳам ҳеч қачон Россияда таълим олмайди, стажировкаларда иштирок этмайди, ўзи учун ҳеч қандай имкониятларга эга бўлмайди, деб ёзди у ўзининг Telegram каналида.
Примаковнинг таъкидлашича, “Россотрудничество” мактаб ўқувчисини калтаклашни қўллаб-қувватловчи ушбу воқеалардаги ҳар қандай бошқа иштирокчига нисбатан, шу жумладан таълим муассасаси раҳбариятига ҳам, агар улар бу ҳолатни яширса ёки тегишли маъмурий чоралар кўрмаса, худди шундай чора-тадбирларни қўллайди.
Мария Львова-Белова: Ўзбекистонда русийзабон ўқувчининг калтакланиши бўйича фавқулодда вазият кўриб чиқилмоқда
Россия болалар омбудсмани Мария Львова-Белова ўзбекистонлик ҳамкасби Сурайё Раҳмонова билан алоқада эканини айтди.
“Рус тилида сўзлашувчи ўқувчининг калтакланиши билан боғлиқ вазият унинг назоратида. Ҳамкасб мамлакат Ички ишлар вазирлиги, Мактабгача ва мактаб таълими вазирлигига сўров юборган. Чилонзор тумани ИИБ томонидан терговга қадар текширув ўтказилмоқда”, дейди Львова-Белова ўзининг Telegram каналида.
Халқаро жиноий суд 2023 йил 17 март куни Мария Львова-Беловани ҳибсга олишга ордер берганди. У Россия президенти Владимир Путин билан бирга Украинанинг босиб олинган ҳудудларидан болаларни Россияга ноқонуний равишда депортация қилишда айбланмоқда.
Россия ва Ўзбекистон Ташқи ишлар вазирлари учрашди
Маълумот Россия Ташқи ишлар вазирлиги расмий вакили Мария Захарова томонидан 27 сентябрь куни эълон қилинди.
“БМТ Бош ассамблеяси доирасида Россия ва Ўзбекистон ташқи ишлар вазирлари учрашуви бўлиб ўтди. Миллатлараро муросасизлик кўринишларига қарши курашиш зарурлигига алоҳида эътибор қаратилди”, деди у.
Ўзи нима гап?
Тошкентнинг Чилонзор туманидаги 188-мактабда рус тили фани дарсида ўқитувчи 6-синф ўқувчисини урди. Ҳолат акс этган видео ижтимоий тармоқларда тарқалиб, кенг муҳокамаларга сабаб бўлди. Facebook’даги “Потребител.uz” гуруҳида ёзилишича, ўқитувчи рус синфига дарсни ўзбек тилида ўтган. Ўқувчи дарсни рус тилида ўтишни сўраган. Шундан сўнг видеода акс этган ҳолат юз берган.
Россия ТИВ муносабати
Россия Ташқи ишлар вазирлиги расмий вакили Мария Захарова Ўзбекистондан юз берган ҳодисага ҳуқуқий баҳо беришни ва болага нисбатан шафқатсизлик қилган айбдорга қарши чоралар кўриш сўралганини айтди.
“Бу масалани диққат-эътиборимиз марказида тутамиз”, деган Россия Ташқи ишлар вазирлиги расмийси.
Тошкент шаҳар мактабгача ва мактаб таълими бошқармаси матбуот хизматининг маълум қилишича, болани урган аёл синов муддати билан мактабга ишга таклиф қилинган, видеодаги воқеа унинг дастлабки иш кунида кузатилган. Воқеадан хабар топган ўқувчининг ота-онаси ҳуқуқ-тартибот идораларига мурожаат қилган. Айни пайтда суриштирув ишлари олиб борилмоқда.
Ўқитувчининг бошқа ҳуқуқбузарликлари
Шу билан бирга, ушбу аёл бошқа бир қанча ҳуқуқбузарликлар содир этгани аниқланган. Қизи ўқийдиган бошқа мактабда мактаб директори ўринбосари бўлган аёлга жисмоний куч ишлатган, Миллий гвардия ва ИИО ходимларига нисбатан ғайриижтимоий муносабатда бўлиб, уларининг қонуний талабларини бажармасдан кескин қаршилик кўрсатган.
Бундай қилмиши учун унга 25 сентябрь куни 7 сутка маъмурий қамоқ жазоси, БҲМнинг 3 баравари (1 020 000 сўм) ва БҲМнинг 7 баравари (2 380 000 сўм) миқдорида жарима жазоси тайинланган.
Алишер Қодиров Мария Захаровага жавоб қайтарди
Алишер Қодиров Россия Ташқи ишлар вазирлиги расмий вакили Мария Захарова Тошкентдаги мактабда ўқитувчи ўқувчини ургани юзасидан Ўзбекистондан тушунтириш сўраганига муносабат билдирди.
Унда бола ҳуқуқи Ўзбекистон мактабида, Ўзбекистон фуқаросининг боласига нисбатан бузилганини ва чораси Ўзбекистон халқи номидан қабул қилинган қонунлар асосида кўрилишини таъкидлади.
“Бизнинг ички ишларимиз ҳақида бош қотиргунча муаммоларга тўла ўзларининг ишлари билан шуғулланишса, тўғри бўлар эди. Текис жойда тўполондан фойда чиқмаслигини тушуниб етишди, деган хулосага эртароқ шекилли”, деди “Миллий тикланиш” партияси депутати Алишер Қодиров.
Изоҳ (0)